Tata SK 612 LPS Pro Fight : Inthlanpui vangin inhnek hun tidanglam

Mizoramin Legislative Assembly member a thlan dawn avangin Tata SK 612 LPS Pro Fight quarterfinal leh semifinal khelh hun sawn hma a ni a, a dang zawng chu a ngai anga kalpui a ni ang.

Ruahmanna hmasaah chuan November 2, 3 leh 4, 2023 zanah quarterfinal khelh tur a ni a, November 6 leh 7, 2023 zanah semifinal khelh tura tih a ni. Mahse, inthlanpui avangin October 30, 31 leh November 1 zanah quarterfinal khelh a ni dawn a, November 3 leh 4-ah semifinal khelh a ni ve thung ang.

Ruahman sa angin October 28 zanah weight hrang pangaah round of 16 khelh zawh a ni dawn a, November 10 leh 11 zanah Title Fight leh Special Fight huaihawt a ni dawn.

October 2 khan LPS Arena, Falkland Vengah Pro Fight vawi 10-na ṭan a ni a, October 14 thlengin inhnek vawi 130 zawh tawh a ni.

Mizo boxer pathumin WBC India title chuh telin Special Fight pathum zeh tel tur nen hian a vaiin inhnek 279 a awm dawn a, October 17, Thawhlehni zanah chhunzawm a ni ang.

Weight hrang pangaah lawmman Rs 6,30,000 sem chhuah a ni dawn a; boxer 16 an tel tlin loh avangin middle-ah semifinal lut chinin lawmman pawisa fai an dawng ang a, weight dang paliah quarterfinal lut chinin an la thei dawn a ni.