Mizoram cricket team chak lo

Board of Control for Cricket in India (BCCI) hnuaia India ram chhung state leh services hrang hrangte inelna - Syed Mushtaq Ali Trophy 2023 atan nimin khan Mizoram chuan an match hmasa ber an khel a, an khingpui Chhattisgarh lakah run 44-in an chak lo.

Jaipuria Vidhyalaya Ground, Rajasthan-a inelna neihah Chhattisgarh lamin an vawm hmasa. Over 20 chhunga run 150 siamin mi pariat an in hloh - Mizoram tan target sang pangngai tak an siam.

Mizoram lamin target um phak tumin an bei, tualchhung player ṭha Joseph Lalthankhuma'n ball 21 a hmachhawn aṭangin run 32 a vaw chhuak - Ramhlun Venglai tlangval bakah hian run 30 siamtu Lalhruaizela a che ṭha bawk.

Mahse, tualchhung player ṭha pahnih an chet ṭhat niah state pawn aṭanga lakluh an che thei lo ve thung - Mizoramin over 20 chhungin run 106 an siam a, run an siam zinga 101 ngawt chu tualchhung player ten an hlawhchhuah a ni.

Mizoram hian vawiinah Baroda an hmachhawn leh dawn. Chumi hnuah - Meghalaya, Hyderabad, Haryana, J&K leh Mumbai te an la hmachhawn chhunzawm leh bawk ang.