A khelh danah Mbappe a lawm lo - Deschamps

France coach Didier Deschamps chuan tun hnaiah an ram captain Kylian Mbappe chu a khelh danah a lawm tawk lo tih a sawi a, a vawi khatna chauh pawh ni loin tun hma lam pawha thil thleng tawh ṭhin a ni tih a sawi bawk.

Mbappe hian tun season Ligue 1 bikah match hmasa ber a khel lo a, a hnu lamah goal sarih a khung leh tawh. Mahse, Champions League-ah Newcastle United lakah an mualpho a, tunah hian league hmahruaitu an ni phak lo bawk a ni.

Deschamps chuan, "A nihna takah chuan club tana a chet ṭhat ber lai a ni lo. A chet ṭhat tak tak hi chuan team hmel hmang tidanglam vek turin theihna a nei a, chutiang chu a thil lo tih ṭhin tawh dan pawh a ni fo.

"Ani hi chu a ṭha thei ang bera khelh reng duh mi a ni a, tunlai a khelh dan avang hian amah pawh a lawm lo. Tun hma pawhin khelh ṭhat loh vanga hrehawm tih chang a lo nei tawh, nakinah pawh a la nei leh ngeiin a rinawn, hei chu hringnun kalphung a ni.

"A lawm lohna hi keini tana chanchin ṭha a ni, a chhan chu ṭha lehzual zawka inkhelh a duh vang tihna a ni. Season bul a ṭan fuh tawk loh chhan hi chu nipui laia a boruak tawn vang kha a nih pawh a rinawm," tiin a sawi.

France hian Euro qualifier khel tur player an ko fel tawh a, mahse hliam vangin defender pahnih Jules Kounde leh Dayot Upamecano te an inhnukdawk, an hmun ruakah hian Chelsea player pahnih Malo Gusto leh Axel Disasi te koh an ni thung.

Amaherawhchu, Blues defender Disasi pawh a hliam ve leh a, malpui hliam vangin a inhnukdawk a ni. A aiawh turin RB Leipzig player Castello Lukeba an ko.

Deschamps-a naute hian Zirtawpni zanah Netherlands an lenchilh dawn a, chumi hnuah Scotland an hmachhawn chhunzawm leh dawn a ni.

France Squad:

Goalkeepers: Alphonse Areola (West Ham), Mike Maignan (Milan), Brice Samba (Lens).

Defenders: Jonathan Clauss (Marseille), Theo Hernandez (Milan), Lucas Hernandez (PSG), Ibrahima Konate (Liverpool), Malo Gusto (Chelsea), Benjamin Pavard (Inter), William Saliba (Arsenal), Axel Disasi (Chelsea).

Midfielders: Eduardo Camavinga (Real Madrid), Wesley Fofana (Monaco), Boubacar Kamara (Aston Villa), Adrien Rabiot (Juventus), Aurelien Tchouameni (Real Madrid).

Forwards: Kingsley Coman (Bayern Munich), Ousmane Dembele (PSG), Olivier Giroud (Milan), Antoine Griezmann (Atletico Madrid), Randal Kolo-Muani (PSG), Kylian Mbappe (PSG), Marcus Thuram (Inter).