Santosh Trophy khel turin Mizoramin Punjab an pan

Hero Senior NFC for Santosh Trophy 2023 khel tur Mizoram football team chuan nimin khan inelna neihna hmun tur Amritsar, Punjab panin Aizawl an chhuahsan. Mizoram team hi manager K. Lalenghluna (Maenga) leh coach Lalsangzuala Hmar ten an ho a, match hmasa berah nikum semifinalist Services an hmachhawn nghal ang.

Mizoram team hian nimin chhun khan Kolkata an thleng a, MFA assistant secretary Lalbiakzuala chuan Kolkata-ah hian a ṭul ang zawng zawng a lo buaipui. Nizan khan Mizoram team hian Amritsar panin Kolkata an chhuasan a ni.

Group Stage-ah hian team 36 chu group parukah ṭhen darh an ni a, Mizoram hi group E-ah Services, Uttarakhand, Pondicherry, Sikkim, Dadra and Nagar Haveli leh Daman and Diu te nen an awm. Group tin aṭangin pakhatna ṭheuhin final round an lut dawn a, pahnihna zinga tiṭha pathumin final round an lut dawn bawk. Final round-ah hian team 12 an awm dawn a, inelna thlengtu tur Arunachal Pradesh bakah nikum finalist Karnataka leh Meghalaya te chu tling sa an ni.

Sulhnu nei ṭha coach Sanga

Mizoram hian kum 2014-ah H. Vanlalthlanga hoa an champion hnuah Santosh Trophy nomawi an la chawi leh lo. Thlanga ho hian semifinal an lut leh a, penalty shootout-ah an vanduai. Coach sulhnu nei ṭha Thlanga hnuaia inchher hriam Sanga pawh hian Mizoram team hi ṭum thum a kaihruai tawh a, vawi hnih semifinal luh puiin a vanduai zawkah aṭang ve ve. Ṭum khat erawh final round a lut zo lo.

Melthum pa Sanga hi Mizo coach thawkrim ber zinga mi a ni a, hlawhtlinna pawh a ngah tawh hle. Coach Thlanga'n Chanmari FC hlawhtlinna a chanpui khan assistant coach a ni a, kum hnih leh a chanve a zui hnuah amahin a kal hrang.

Chanmari FC zawhah Sanga hian Bethlehem Vengthlang FC a zawm a, ama pualin club a enkawl ṭan. BVT hi 2015 MFA Super cup-ah a champion pui a, MPL-ah pawh semifinal a thlenpui. BVT aṭangin Chanmari FC-ah a kir a, MPL5-ah a champion pui leh bawk.

Sanga hi a kalna apiangah nomawiin a zui tihtheih a ni a, Chhinga Veng panin nomawi chawi theih pathum MFA Super Cup, I Day Football leh MPL-ah a champion. Season hnihnaah pawh Super Cup leh I Day Football-ah a champion pui leh a, MPL7 final-ah Aizawl FC lakah an vanduai.

Chhinga Veng aṭangin Sanga'n Electric Veng FC a zawm a, I Day Football a champion pui nghal. MPL8-ah pawh Electric Veng hi final a thlenpui a, Aizawl FC lakah bawk an vanduai. Season liam ta khan Chawnpui FC a enkawl a, mak takin MPL9-ah Chawnpui FC hi a champion pui leh bawk. Sanga hi MPL nomawi pathum chawi thei hmasa ber a ni a, club hran vek a champion pui bawk.

Sanga hian Captain NM Gupta Trophy, Silchar-ah kum 2017 khan Mizoram senior team a champion pui a, veng leh veng inelnaah pawh Bethlehem Vengthlang chu NECS Cup 2016-ah a champion pui. Kum 2022 khan Melbuk enkawlin Champhai Inter Village-ah a champion pui a, Melbuk tho hi kumin MFA Cup-ah a champion pui bawk.

Kuminah Sanga hian MPL club Chhinga Veng FC a enkawl a, kumin I Day Football final-ah Aizawl FC hnehin a champion pui. Mizoram coach Sanga chuan, "Inpuahchahna hun kan nei rei lo a, kan hun neihchhun hi Mizoram tan kan theihna zawng zawng kan hlan. Hlawhtlinna chan ngei kan duh a, kan hmalam hun erawh kan thuneihna piah lam a ni. Mizo mipuite Mizoramin result ṭha kan neih theih nan min ṭawngṭai sak ṭheuh turin kan ngen tak meuh a ni," tiin Vanglaini a hrilh.

Mizoram team chu

Santosh Trophy-ah hian I League club player an tel thei lo a, Mizoram aiawh turin Aizawl FC player thlan theih an ni lo. Player thlante hi MPL aṭang vekin a ni a, Aizawl FC bakah hian Electric Veng, Project Veng FC leh FC Venghnuai aṭangin player thlan an ni lo bawk.

Kumin I Day Football champion Chhinga Vengin player an thawh hnem ber a, player pakua an awm. Table hmahruaitu Chanmari FC aṭangin player paruk an tel a, Mizoram Police leh Chawnpui FC aṭangin player panga leh pahnih thlan an ni.

Chanmari FC captain Lalrinchhana Tochhawng chuan Mizoram tan captain hna a chhunzawm dawn a, Mizoram Police midfielder R. Malsawmtluanga leh keeper F. Lalmuanawma ten vice captain hna an chelh bawk ang.

MPL-a hming langsar R. Laldanmawia, Lalbiakhlua (Biaktea) leh MS Dawngliana te chu chhungkaw harsatna avangin an tel thei lo. Goal khung thei bik striker Malsawmfela pawhin ṭhangthar player-te kianin kal lo turin thutlukna a siam a, Mizoram Police captain Lalfakzuala leh MPL10 best defender Lalruatfela te hliam vangin an tel thei lo bawk.

Mizoram coach Lalsangzuala Hmar chuan, "Hnah hluite an ṭil a, hnah tharin a rawn thlak, an tih ang khan tawnhriat nei player-te hi chhawr la duh viau mah ila, theih loh chin a awm. Chuvangin ṭhangtharte hi kan rin ngam a ṭul a, tuna kan naute hi kan ringtawk êm êm bawk. Kan team-ah hian senior leh naupang zawk a inchawhpawlh ṭha a, kan player neih danah kan lungawi," tiin Vanglaini a hrilh.