Football-a state inelna sang ber Santosh Trophy

'Santosh Trophy' tih hi football inelna hming a ni a, India rama state hrang hrangte leh sorkar institutions (Railways, Services) te intihsiakna a ni.

He inelna hi 1941-a ṭan niin Bengal chu champion hmasa ber an nih bakah champion ngun ber niin vawi 32 an champion tawh. 1996-a National Football League (tuna I League) ṭan a nih hma khan India rama football tournament ngaih hlut ber a ni a, state leh state inelna a nih miau avangin tun hma chu pha tawh lo mah se tun thlengin ngaihhlut a hlawh hle.

Trophy hi Indian Football Association (Bengal football thuneitu sang ber) President ni ṭhin Maharaja Sir Manmatha Nath Roy Chowdhary of Santosh pek a ni a, a hming hi a pu zui bawk. Runners up trophy 'Kamla Gupta Trophy' pawh hi IFA pek tho a ni.

Engtia inṭan nge?

January 27, 1941-ah annual AIFF general body meeting vawi 5-na chu Bombay-ah neih a ni a, he mi kum vek hian inter-state championships hi ṭan nghal a ni. Sum sen tihtlem nan kumin ang bawkin zone-a khelh a ni a, zone tina pakhatna ṭheuh chu final round khel turin an tling.

Santosh Trophy champion hmasa ber hian Rs 2,000 an dawng a, a hunlai chuan pawisa tam tham tak a ni. A bul ṭan kum hian team 13 an tel a, an awmna hmun zir zelin a hnuaia mi ang hian zone a ṭhendarh an ni.

Zone A: North West Frontier Province (NWFP, tunah chuan Pakistan ram chhung a ni tawh), North West Indian Football Association (NWIFA pawh hi Pakistan-ah an bet tel tawh) & Army Sports Control Board (ASCB).

Zone B: Delhi, Rajputana and Sind

Zone C: Bengal (IFA), Dacca (Bangladesh-ah an bet tel), Bihar & U.P.

Zone D: Madras, Mysore & Bombay (Bombay hi tunah chuan Western India Football Association tih a ni tawh)

Calcutta-ah final round khelh niin Bengal chu champion hmasa ber an ni a, final-ah Delhi chu 5-1 in an hneh. Tournament-a match chhinchhiah tlak ber erawh semifinal-a Bengal leh Bombay (WIFA) inkhel a ni a, goal awm chhun hi Bengal left winger Pat D’Mellow-a'n corner aṭangin a khung a, Bombay hian English professional pahnih Hill leh Langton-te an khelhtir a, heng player pahnih hi Blackburn Rovers tana lo khel tawh ṭhin an ni.

Goal, Goal, Goal

Santosh Trophy hi vawi 77 zet khelh a ni tawh a, he inelnaa goal khung tam ber chu Inder Singh niin Punjab striker hian goal 45 tehmeuh a khung a, amah hnaih bertu chu Mohammed Habib niin goal 34 a khung a, Habib hi chuan Andhra Pradesh leh Bengal tan a khel.

Santosh Trophy-ah hian tun hma chuan player hi khawi team tan pawh khelh theih a ni a, hemi a nih vang hian Indian footballer zingah team pakhat aia tam tana khel an awm bawk. Inelnaah hian an pianna state leh an club khelh mekna state-ah an khel thei, tih a ni.

Indian football encyclopedia an tih mai, Novy Kapadia chuan Santosh Trophy-a goal ropui ber a tih chu ball thiam vang leh goal thun theih vanga lar Chuni Goswami, T. Balaram, Inder Singh, P.K. Banerjee, Zulfiqar, Moin leh Sukalayan Ghosh Dastidar te thun lam ni loin India international defender Arun Ghosh-a thun a ni daih mai. He defender hian 1960-a Bengal leh Assam-te'n quarterfinal an khelh ṭumin goal ropui a khung a, mawi zet maiin chakna goal a volley lut a ni.

Santosh Trophy hi a hlu

Santosh Trophy hi India rama football inelna ropui ber a nih ṭhin avangin he tournament hi player inpholanna remchang a ni. Tun hmaa Indian footballer langsar IM Vijayan, Bhaichung Bhutia, Joe Paul Ancheri leh player dangte khan he inelna hi hming chher nan an hmang ṭangkai hle.

India goalkeeper hlui Tanumoy Basu chuan, "Bengal team-a tel hi a harsa khawp mai a, a chang chuan India aiawha khel player pawh hian starting XI an chang pha lo hial ṭhin. Bengal team tana khelh hi hlawhtlinna a ni a, season tluana club tana theihtawp kan chhuah chhan pakhat chu Bengal tana Santosh Trophy kan khelh duh vang a ni," tiin a sawi.

Bengal vawi thum champion pui tawh Basu chuan a captain-na hnuaia Bengal an champion ṭum sawiin, "Champion ngun ber Bengal team tana ka captain thei kha ka lawm a, 1994 final kha ka theihngilh thei lo - Punjab nen hun pangngaiah 1-1 in kan inhnehtawk a, extra time-ah golden goal dân hman niin Bhaichung-a'n chakna goal a khung a, khatih laia ka awm dan kha thuin ka sawi chhuak thiam lo," a ti hial.

Player kailawn pawimawh

India goalkeeper ni ṭhin C Mustafa chu 1960 khan Calicut-ah an state Kerala tan Santosh Trophy hmasa ber a khel a, a khelh ṭhat avangin Mohammedan Sporting chuan an la nghal a, Kolkata team hi 1964-ah DCM Trophy-ah a champion pui zui a ni.

Indian footballer ball thiam an sawi apianga an sawi tel ṭhin Chuni Goswami chuan 1955 khan Ernakulam, Kerala-ah Santosh Trophy khel ṭanin hming a chher nghal a, Kerala football fan-te'n a chevel hmuhnawm an ti a, tun thlengin he player ropui chanchin hi Bengal leh Kerala-ah chuan an la sawi uar hle a ni.

Indian footballer ropui ber zinga pakhat PK Banerjee pawh khan 1953-ah Calcutta-ah kum 17 mi lek niin Santosh Trophy hi Bihar tana khel ṭanin Madras an hneh ṭumin goal awmchhun a khung. Bengal an draw ṭuma a khelh ṭhat avangin season thar aṭangin Calcutta-ah inkhel turin a kal nghal bawk.

Indian footballer langsar tam tak hi Santosh trophy aṭanga lang chhuak an ni a, tun thleng hian I League club-te'n an club tichak thei tur player zawnna atan an la hmang zel. ISL club tan pawh Santosh Trophy-a che ṭha player hi en kan ngawt theih a ni lo.

Hun pawimawhte

Kum 1958 khan Madras-ah, league leh knockout inkawp chu hman ṭan niin Bengal chu champion hmasa ber an ni a, Tulsidas Balaram-a goal mawi tak hmangin Services an hneh.

March 6, 1983-ah Goa chuan a vawi khat nan he nomawi hi an chawi a, hemi kum hian Bengal nen joint champion niin hei bak hi joint champion an awm leh ta lo.

Kum 1990-ah AIFF chuan he inelna hi enchhin nana hmangin Under 23 tournament angin a kalpui a; May 27, 1990-ah Goa chuan Kerala chu Margao stadium-ah 2-0 in an hneh a, Goa team member te hian Rs 30,000 ṭheuh an dawng.

Under 23 hi kum thum chhung hman a ni a, 1993-94 Santosh Trophy Cuttack-a khelh ṭum aṭangin kum bithliah hi tihtawp a ni.