India leh Remsiami tan bronze medal

Mizo nula Lalremsiami Hmar telna Indian Women's Hockey Team chuan Asian Games 2023-ah bronze medal an hlawh chhuak. Pathumna zawnna inkhelah India hian team ṭha Japan chu 2-1 in an hneh.

Hangzhou, China-a inelna neihah India nulate hi pool match an khelhah tlawm an nei lo a, vawi thum chakin vawi khat an inhnehtawk. Mahse, semifinal-ah inelna thlengtu China an ngam lo, pathumna inchuhnaah erawh an chak.

India tan Deepika-i leh Sushila Chanu Pukhrambam-i ten goal khat ve ve an khung a, an khingpui Japan tan captain Yuri Nagai chuan goal khat a khung ve bawk. India hneh loh China hian final-ah South Korea hnehin an champion thung a ni.

Mizo nula Remsiami chuan, "Semifinal-a kan chak loh hnuah bronze medal kan hlawh chhuak ve leh a ni a, an duh ber gold medal la ta chiah lo mah ila kan thlen chinah kan lawm. Tuna medal kan lak hi Pathian leh India tan ka hlan.

"Tournament ṭha tak kan khel niah ka ngai a, mimal tak pawhin ka khelh danah ka lungawi," tiin Vanglaini a hrilh. Remsiami hi forward ni mah se ball sem tura tawlh hnuntir a ni fo a, tournament an khelh dangte angin goal a khung tam tawk lo deuh.

Asian Games champion hi Paris Olympic khel turin an tling chiang nghal - India erawh an champion phak tak loh avangin Olympic 2024 atan qualifying an khelh a ngai dawn. Hockey India chuan player zawng zawng hnenah cheng Rs 3,00,000 ṭheuh a pek tur thu an puang nghal a ni.