'Zawlnei ama khuaah chawimawiin a awm ngai lo' tih letling chiahin Sweden legend Zlatan Ibrahimovic chu a pianna ramin an chawimawi a, Thawhlehni khan Malmo Stadium kawtah Ibra lim siam chu tlangzarh a ni. 

Swedish FA-in an striker ropui chawimawi nana an din lim hi bronze hmanga siam a ni a, ft 8 leh 9in a sang niin a rih zawng hian kg 500 a hnaih thuak bawk. 

Ibra chuan, "Khawi hmun aṭanga lo chawr chhuak pawh ni la, khawia mi pawh ni la, eng ang mi pawh ni la, eng pawh i ti thei tih pholanna chu he lim hi a ni," tiin a sawi. 

Kum 38 mi striker hian Sweden tan 2001-2016 chhungin match 116 a khel a, goal 62 a khungsak. Swedish club ṭha Malmo-ah a career ṭanin Ajax, Juventus, Inter Milan, Barcelona, AC Milan, Paris St-Germain, Manchester United leh LA Galaxy tan a khel tawh a, a hlawhtling vek. 

Khawvel huap player langsar zingah pawh mahni puala 'lim' hial nei hi an tam lo. England captain David Beckham, Portugal leh Juventus forward Cristiano Ronaldo leh Egypt leh Liverpool striker Mohamed Salah te chu anmahni 'lim' hmangin chawimawi an lo ni tawh. 

Share this Post