Thawhlehni zan Mizoram Premier League Season 8 inkhel hmuhnawmah Aizawl FC leh Chanmari FC te goal awm loin an inhnehtawk. Inkhel boruak a san avangin AFC assistant coach B. Malsawmzuala chu second half-ah hnawhchhuah a ni.

Chanmari FC keeper Zothanmawia chuan AFC defender Richard Kassaga penalty pet dangin man of the match-ah thlan a ni a, I League club coach Standly Rozario chuan, "Man of the match-ah Chanmari keeper thlan a ni a, chu chuan inkhel kal hmang a sawifiah," tiin Vanglaini a hrilh.

An innawr nasa

Chanmari tan H. Lalmuankima leh MS Dawngliana ten bul an ṭan a, Lalnunzama erawh khup hliam vangin bench-ah a la ṭhu. Aizawl FC pawhin an neih ṭhat luhtirin Lalremsanga thlawp turin Alfred Kemah Jaryan a awm a, ding leh veiah Rochharzela leh Isak Vanlalruatfela ten an thlawp bawk.

Team pahnihin nung takin bul an ṭan a, Aizawl FC an khel ṭha zawk. Lengpui tlangval Remsanga'n Chanmari keeper T. Mawia chiah a hmachhawn hnuah a khung thei lo a, Dawngtea'n Chanmari tana chance ṭha ber goal-ah a chantir thei lo.

Second half-ah I League club an chungnung lehzual a, ZoFooty statitistics-ah pawh Aizawl FC hian hun chanve hnu lamah 58% an nei pha hial. Amaherawhchu Standly Rozario hoten an hun ṭha neih an hmang ṭangkai lo a, David Rinmuana handball vanga an penalty an hmuh pawh Ugandan defender Richard Kassaga'n minute 72-naah a hlah.

AFC forward Remsanga leh Rochhara te goal khung tur keeper T. Mawia'n a dan sak vek a, College Veng tlangval hi Chanmari chhanhimtu a ni. Chutihrualin MK-a ball pet ṭha tak chu AFC keeper Lalawmpuia'n ṭha zetin dang lo se Mama hoten point thum an hmu thung ang.

An sawi zui e

Aizawl FC coach Standly Rozario chuan, "Ka naute an khel ṭha a, point thum pawh hmu lo mah ila kan khelh danah ka lungawi. Richard pawhin penalty hlah mah se ka sawisel lo - goal zawnah a pet miau a, a vanduai ve theih," tiin Vanglaini a hrilh a, penalty pet tur a thlan loh thu a sawi tel bawk.

Chanmari FC coach S. Malsawmtluanga chuan, "Kan inkhelah hmasawnna hmuh tur a awm zel. Team ṭha tak lakah point khat kan hlawh chhuak a, vanneih ṭum chu ni se point thum pawh hmu thei tur kan ni," tiin an khelh danah lawmna tur a hmuh thu a sawi.

Share this Post