Inkhel hautak hmachhawn turin ka inpeih - Neuer

Bayern Munich goalkeeper Manuel Neuer chuan zanin dar 11:00-a Bayer Leverkusen nen Bundesliga inkhel hautak hmachhawn tura a inpeih thu a sawi.

German champion Bayern hian Leverkusen khelmualah hian record an nei ṭha lem lo, inelna hrang hrangah BayArena-ah hian kum 2013 March thlaa 2-1 a hnehna an chan bak an la hlawhtling leh lo a ni.

Manager kal chhuak tur Pep Guardiola enkawlna hnuaiah Bayern hian 2013-14 season khan an match hmasa 19 aṭangin point 51 an hmu thei a, Bundesliga chanchinah season bul ṭan fuh ber an ni. Kuminah he an record hi point khat chauhin an phak lo.

Bayern hian tlarhnungah buaina an nei a, an rinrawl Jerome Boateng leh Javi Martinez te hliam vangin an inkhel thei lo mek a, Medhi Benatia a la fit tawk lo bawk. Russian club Spartak Moscow aṭanga loan-a an lakluh Serdar Tasci chu training naah a lu a tih nat avangin zanin hian a inlan thei dawn lo bawk.

Germany goalkeeper Neuer chuan, "Inkhel hautak a ni dawn tih kan hre lawk, Leverkusen chuan inkhel bul ṭan tirh aṭangin na takin min nawr dawn tih ka hria. Hun harsa kan lo paltlang fo tawh a, tun ṭumah pawh hian chumi tur chuan ka inpeih tawh e," tiin an inpeih tawh thu a sawi.