Tleirawl tennis khel thiam Coco Gauff chu Linz Open khel turin in vaw kai zo lo mah se a inlan thei dawn tho! Seeded chang phak tur zinga mi Maria Sakkari chu hliam vanga a inlan theih dawn loh avangin Gauff tan hmun ruak hi a awm theih phah.

American tleirawl hi qualifier-ah Tamara Korpatsch hneh loin a tla. Mahse, seeded parukna Sakkari hi a banrek dinglam na vangin a inlan thei dawn lo a, kum 15 mi Gauff a vanneih phah.

Wimbledon-ah khan Gauff hian qualifier paltlangin main draw a in vaw kai a, a match hmasa berah Venus Williams hnehin khawvel a barakhaih. Fourth round thleng hial mah se Naomi Osaka a ngam lo.

Japan nula Osaka hneh lo mah se Open Era chinah Wimbledon khel tura in vaw kai thei naupang ber a ni a, tun hma lama sulhnu ropui la nei lo mah se a thlen chin apiang hi tennis khawvel ngaihven a nih phah.

Gauff chuan, "Ka chak lo a, hotel-ah letin tih tur ka nei tawh hran loah ka ngai. Mahse, phone call ka dawng a, inelna hmachhawn tura ka tel theih tur thu hrilh ka ni," tiin a sawi.

Linz Open-ah hian first round-ah beisei loh result kan hmu nghal. Champion tura rinkai zinga mi, seeded pahnihna Belinda Bencic chu qualifier aṭanga in vaw tling Anna-Lena Friedsam lakah 6-1, 6-1 in a chak lo. 

Share this Post