Minister-in hna zawh tawhte a hawng

Minister of state Robert Romawia Royte chuan nimin zing khan a bial, Aizawl East-II huam chhunga sorkar hmalaknaa hnathawh paruk a hawng a, hna thawh tur pali lungphùm a phúm nghal.

Robert Romawia'n a hawnte chu - Armed Venga kawng cheng nuai 68 sênga siam leh luikawr chunga lei cheng nuai 149-a siam te, District Jail leh CRPF Camp inkar hawng cheng nuai 16 hmanga siam te, Tuithiang venga kawng cheng nuai 50 sénga siam te, Chite Venga kawng cheng nuai 50 sênga siam leh Chite lei cheng nuai 205 senga siamte a ni.

Minister hian cheng nuai 30 senna tur Armed Veng South futsal ground, cheng nuai 20 senna tur Tuithiang futsal ground cheng nuai 300 sènna tur Armed Veng mawnga checkdam siam tur leh, Chhinga Veng leh Electric Veng inkara RCC link drain cheng nuai 85 hmanga siam tur lungphùmte a phúm bawk.

Robert Romawia Royte hian October 5, Ningani tlai pawh khan Aijal Club-ah a department - Sports & Youth Services, Tourism leh Information & Communication Technology department hnuaia project hrang hrang zawh tawhte a hawng a, hna thawh tur sum hmuh tawhte lungphùm a phúm nghal.

Robert Romawia chuan, a enkawl department pathuma thawktute nen kum nga chhung thawhhona ṭha tak an neih thu sawiin, project hawn tak leh lungphùm phùm tâkte chu a vaiin cheng nuai sing chuang man a nih thu leh Mizoram mipui tana ṭangkai tak a nih ngei a rin thu a sawi. Hmasawnna hnathawhte hlawhtlinna chhan pakhat chu a tir aṭanga langtlang taka kalpui vang a nih thu a sawi a ni.

05.10.2023-A MINISTER-IN A HAWNTE
1. Synthetic turf hockey ground, MSSC Sports Complex, Muallungthu - Cheng vbc. 5.50 (Khelo India)
2. Multipurpose Indoor Hall, Sihphir - Cheng vbc. 12.77 (NEC)
3. MSSC Sports Hostel, Mualpui - Cheng vbc. 8 (NEDP)
4. CSC, Bungtlang South, Bunghmun, Chawngte, Rângte, Zawlnuam - Cheng vbc. 7 (PMJVK)
5. Volleyball court @ Tuidam, Kanhmun, Thinghlun, Dárlâk, Zamuang, Kawrthah North, Sihtlangpui - Cheng vbc. 2.20 (PMJVK)

05.10.2023-A LUNGPHUM A PHUMTE
A. Sports Department:
1. Football stadium @ Lunglei Lena Stadium, Khawzawl Mualvawn Field, Hnahthial, Mamit, Keifang.
2. Boxing hall @ Lawngtlai, Siaha, Serchhip
3. Wrestling hall, Saidan, Kolasib
4. Judo hall, Champhai

B. Tourism Department:
1. Development of Kalvari Tlang, Khawruhlian - Cheng nuai 273.01
2. Development of Prayer Mountain, Hangi Lunglen Tlang - Cheng nuai 491.27
3. Pilgrimage and Heritage Tourism Facilitation and Congregation Centre - Cheng nuai 3,149.23

C. ICT Department:
1. IT Skill Development & Training Center, MCA, Mizoram - Cheng nuai 693.
2. Mizo Fibre Grid Network - Cheng nuai 5,000
3. Village Knowledge Centre - Cheng nuai 450
4. Mizoram SDC & Cloud Enablement - Cheng nuai 2,250