Maria Sharapova chuan harsatna hrang hrang tawk mah se a la beidawn loh thu a sawi a, karleha khelh tur Luxembourg Open-ah chuan harsatna dang a thleng thut a nih loh chuan inlan a tum.

Grand Slam vawi nga champion tawh hi hrem a nih hnuah inkhel ve leh nual tawh mah se a la hlawhtling lo. Tennis court chhungah result a nei ṭha lo a, hliam a nei deuh reng bawk.

Russian nula Sharapova chuan, "Tunah chuan kawng dik ka zawh mek, ka dar hliam endik kan neih tawh chin chu a la ṭha vek. Luxembourg lamah chuan inkhelh theih tawh ka beisei.

"Mahse, inkhelh duh lutuk vanga dam chiang lo chunga inlan chu ka tum hran lo, rilru fim tak put a ngai. Tuna inkhelh theih chu duhthusam a ni a, chutihrualin ka rawn kir hun hi nakkum daih pawh a ni thei," a ti.

Kum 32 mi Sharapova hi thla li vel zet chu hliam vangin a chawl tawh, hmeichhe tennis player hlawhtling berte zinga mi hi a vanglai chuan midang chunga leng ni mah se a tawp lamah buaina a tawk nasa ta hle.

Share this Post