Chhetri-a'n record a siam leh tawh

Nilaini zan Indian Super League inkhelah Bengaluru chuan 2-1 in East Bengal an hneh a, Bangalore club tana penalty chhuih luttu Sunil Chhetri chu ISL-a club pakhat tana goal 50 khung tling thei hmasa ber a ni.

Mikhual team East Bengal hian Naorem Mahesh Singh hmangin minute 15-naah goal hmahruai an khung a, an hlim chhung erawh a rei lo hle. Minute thum hnuah Mandar Rao Dessai chuan Chhetri titluin penalty a chawi a, Chhetri hian goal-ah a chantir.

Bengaluru tan Javi Hernandez chuan minute 72-naah mawi zetin an goal hnihna a 'bin' lut zui a, Kolkata club-in a chhanletna tur an neih loh avangin East Bengal an chak - East Bengal boss Carles Cuadrat-a'n a club hlui Bengaluru lakah chak tum viau mah se hnehna hlado a chham thei ta lo a ni.

Bangalore club tan Lalremtluanga Fanai chu bench aṭangin luhtir a ni a, Bawngkawn rawlthar tan ISL-a a match hmasa ber a ni - East Bengal tan Lalchungnunga'n inkhel bul a ṭan leh tawh a, a team erawh a chakpui zo lo.