Murray-a'n Australian Open a khel dawn

Andy Murray chuan hma a sawn chho zel a, season thara Grand Slam khelh hmasak ber tur Australian Open-ah inlan theih a beisei. Melbourne Park hi major tournament a khelh hnuhnun berna hmun kha a ni.

World number 1 hlui Murray hi Sanghai Masters-ah wildcard hmangin a inlan mek, a match hmasa berah Juan Ignacio Londero chu 2-6, 6-2, 6-3 in a hneh. Season khat chuang hnua a vawi khat nan kar hmasa khan China Open-ah quarterfinal a lo lut tawh bawk.

Kum 32 mi Murray chuan, "Hma lam ka pan zel, match hmasa ka khelh aiin a hnuhnung zawk chu a ṭha telh telh niin ka hre bawk," a ti. Britain tlangval hi tun dinhmunah world number 289 a ni mek, tournament lian khel phak tur chuan a ranking a siam ṭhat chhoh a la ngai hle.

Grand Slam vawi thum champion tawh Murray chuan, "Taksa dam veng vawngin inkhelh theih ka tum," tiin Australian Open-ah a inlan theih a beisei. Kumin kumtira Australian Open-ah khan Murray hi chawl tawh turah ngaiin 'video'-a tennis player langsar hrang hrangte thusawi nen an thlah chiam a, amaherawhchu Murray hian inkhelh zel a la tum thung.

Australian Open buatsaihtu lam hian hmeichhe singles player Kim Clijsters pawh wildcard an pek a rinawm. World number 1 hlui hi fa a neih hnua rawn kir leh tur a ni a, tennis a khelh leh chhan tur pakhat chu fa neih hnuah Serena Williams inkhel chuan chona a pek vang a ni.



Share this Post

Login to comment
No Comments