Zaninah Sanga'n a club hlui a hmachhawn dawn Chhinga Veng Vs Electric Veng

Mizoram Premier League Season 8-a hneh loh la tawng lo pahnih Chhinga Veng FC leh Electric Veng FC te zanin dar 7:00 hian Lammualah an inhmachhawn dawn.

Coach tawnhriat nei ṭha Lalsangzuala Hmar-in Electric Veng a enkawl tawh a, MPL-ah a vawi khat nan a club hlui Chhingcows nen an intawng ang.

Intawn vawi 1-na

Kumin I Day Football-ah Sanga'n Electric Veng a enkawl hnua a vawi khat nan Chhinga Veng a hmachhawn a, semifinal hmuhnawm takah hnehna an chang.

Electric Vengin I Day Football nomawi an chawi zui a, MPL atan pawh inrintawkna nasa tak an neih phah. Amaherawhchu, Sanga'n a club hlui Chhinga Veng aiin an ṭha zawkah a la ngai lo.

Coach Sanga chuan, "Chhinga Veng hi club ṭha zawk an ni a, entirna awlsam tak chu bench 

aṭangin MC-a an luhtir thei. Keini aiin squad an nei chhah zawk. Chuvangin keini hi rinkai zawk kan nihna a awm lo a, pressure kan nei lo," tiin Vanglaini a hrilh.

Intawn vawi 2-na

Zanin hi an vawi hnih intawnna tur a ni a, Electric Vengin an match hnuhnung berah Chawnpui FC 3-1 in an hneh. Chhinga Veng erawh Chanmari FC nen 2-2 in an inhnehtawk a, MPL8-ah point thum chiah an la hlawh chhuak.

Chhinga Veng coach Anand Gurung chuan, "Match thumah point thum kan hlawh chhuak a, vawi khat chauh la chak ang kan ni. Kan khingpui tur Electric Veng erawhin point nga an hmu tawh a, dinhmun siam ṭhat kan duh a nih chuan point thum hmuh a ngai a, chak tumin kan khel ang," tiin attacking football an khelh tur thu Vanglaini a hrilh.

Electric Veng coach Sanga pawhin, "Chhinga Veng hi khelh an hautak dawn. Chak ngei an duh avangin na takin min nawr dawn a, kan nawr ve chiam lo ang. Fimkhur takin an chak lohna laiah chhut chat chat kan tum dawn a ni," tiin a sawi.

A tawp khar ṭhat

Electric Vengin freekick specialist Jacob Lalrawngbawla an kawl a, Shillong Lajong midfielder hlui hian I Day Football-a an intawn ṭumin freekick aṭangin goal awmchhun a khung.

Chhingcows coach Anand chuan, "Freekick hi dan a harsa, kan dan theih dan chu foul loh a ni. Yard 25 chinah chuan foul lo turin kan inhrilh a, kan chetsualna ngaiah tihsual nawn kan tum lo," tiin a sawi.

Chhinga Veng hian point thum chauh hlawh chhuak mah se match hnihah an vanduai. Aizawl FC lakah 2-1 hma an hruai reng a, amaherawhchu injury time-ah Lalramhmunmawia'n I League club tan siphurh a sut. An match hnuhnung bera Chanmari FC nen an inhnehtawk ṭumin defender Vanlalchhuanga'n minute 87-naah an lamah a tilut - an vanduai takzet.

Anand Gurung chuan, "Hun tawp lamah kan talbuai leh ṭhin. Training-naah theihtawp kan chhuah bakah kan infuih a, kan rilru put hmang kan thlak hret chuan kan buaina aṭang hian kan chhuak thei ang," tiin chetsual nawn a tum lo.

En châkawm

Chhinga Vengin attacking football an khel a nih chuan Electric Veng tlarhnung inrem dan chu hmuhnawm a tling thei ang. Sanga hian defence laiah MPL best defender ni lai PC Laldinpuia leh Rorelliana te a hmang ngei dawn a, mual sirah Lalmalsawma (Buanga), Lalnunmawia leh Zomuanpuia te inkarah duh thlan tur a awm ang.

Chhingcows lamah K. Lalnunzama (Valtea) chu ngalrek hliam vangin a khel thei dawn lo a, NECS Cup 2019 best player tel loa midfield an inrem dan tur hmuh a châkawm. 

Team pahnihin ball thiam an kawl ve ve. Electric Veng winger Ramhlunchhunga chevel a hmuhnawm ang bawkin Chhinga Veng midfielder C. Lalchungnunga khel a en tlak a, danglamna thlen thei an ni.

Electric Veng coach Sanga'n Chawnpui an hmachhawn ṭumin bench-ah David Lalchhuanawma a dah a, Salem Veng tlangvalin goal hmangin bul ṭan tlak a ni tih a pholang. Chhinga Veng striker MC Malsawmzuala'n goal li a khung tawh a, Siaha tlangval pawh hi Chanmari nen an intawnin bench-ah a awm.

Mipui an pawimawh

Chhinga Vengin ṭantu an nei ṭha ṭhin tunah erawh an ṭha tawk lo. Electric Veng erawh an la ṭha reng a, Chhingcows lakah chak thei an nih avangin entu an tam lehzual ang.

Sanga chuan, "Kan player-te hi an la naupang a, auh phur an mamawh ṭhin hle. Mipui puihna kan mamawh a, ṭawiawmna pawh kan neih ṭhat ngei ka ring," tiin Electric Veng mipui chungchang a sawi.

Chhinga Veng coach Anand Gurung pawhin, "Entu nei ṭha ber zinga mi kan la ni reng a, mahse hei hi a tawk lo. Khelmualah pawh team ṭha ber nih kan tum angin entu pawh nei ṭha ber ni ila kan duh hle," tiin a sawi ve bawk.



Share this Post

Login to comment
No Comments