
Porto khelmualah Barca an chak hram
Spanish champion Barcelona-in Porto khelmualah hnehna chang turin vanneihna an mamawh a, first half hun pek belha Ferran Torres goal khung hmangin FC Porto chu 1-0 in an hneh hram.
Barcelona tan striker chhuanvawr Robert Lewan-dowski chu minute 34-na lekah hliam vanga lakchhuah a ngai a, mahse, Polish striker lakchhuah hi Catalan club tan vanneihna a chang zui - Lewy hliam hi ngaihtuahawm a nih loh thu Barca boss Xavi chuan a sawi.
First half hun pek belh minute khatnaah Manchester City captain hlui Ilkay Gundogan chuan Torres tan ṭha zetin a siamsak a, Spanish forward hian mawi taka a lakluh hnuah 'cool' takin inkhela goal awmchhun a khung.
Porto vanneih zan a ni lo - Portuguese club hian second half-ah na takin Barca hi an nawr let a, mahse, inkhelh pumpuiah vawi 13 zet shot an nei thei chungin a pawimawh ber goal an khung thei lo.
Barca tan goalkeeper Marc-Andre ter Stegen chuan innghahna tlak a nihzia a pholang nawn a, Brazilian defender Wendell, winger Galeno leh Mehdi Taremi te chance neih ṭhat chu ṭha zetin a dansak a, Iranian striker Taremi hi bicycle kick hmanga a khung chu offside vangin pawm a ni lo bawk.
Porto hi minute 80-naa penalty an hlawhchhuah chu sutsak an ni bawk - Joao Cancelo handball vangin Porto hian penalty an hlawhah an inngai hman.
Mahse, video assistant referee a inrawlh a, ball-in Cancelo kut a per hma hian Porto midfielder Stephen Eustaquio kut a per hmasa a, Barca-in freekick an hlawh ta zawk.
Hun pek belhah Barca midfielder Gavi chuan a yellow card pahnihna hmuin hnawhchhuah ni mah se, Porto tan a tam zawk nih chhawr turin hun a tam tawk tawh lo a, mikhual Barca an chak.
Barca tan hian rawlthar duhawm Lamine Yamal chuan inkhel bul a ṭan a, kum 16 leh ni 83 mi niin, Champions League match-a inkhel bul ṭan thei naupang ber record a siam.
Group H-ah Barca hian match hnih khela point ruk hmuin hma an hruai mek a, FC Porto leh Shakhtar Donetsk ten point thum ve ve neiin, Barca-in 5-0 a an lo sawp tawh Royal Antwerp chu table mawngphahah point nei loin an awm.
Belgian club Royal Antwerp hian Shakhtar Donetsk mikhualin, 3-2 in an ngam lo. Antwerp hian Michel Ange Balikwisha leh Arbnor Muja goal hmangin 2-0 in hma an hruai hman a, mahse, Ukrainian club hian second half-ah Danylo Sikan (2 goals) leh Yaroslav Rakitskiy hmanga chhangletin, an chak ta daih a ni.