Factory complex lungphùm phúm

Commerce & Industries minister Dr R Lalthangliana chuan October 3, Thawhlehni khan Aizawl, Lunglei, Champhai leh Kolasib-a flatted factory complex sakna tur lungphùm a phúm.

Flatted factory complex hi in (building) pakhata industrial unit hrang hrang awm theihna tur a ni a, sorkar laipuia Ministry of Micro, Small & Medium Enterprises (MSME) aṭanga hmuh sum hmangin Industrial Growth Complex Luangmual, IIDC Lunglei Pukpui, IIDC Champhai Zote leh Kolasib DIC Complex-ahte din tur a ni.

Sorkar thuchhuahin flatted factory complex dinna atana sum ruahman zat a tarlan chu, Aizawl atan cheng nuai 998.45, Lunglei atan cheng nuai 997.96, Champhai atan nuai 993.36 leh Kolasib atan nuai 1,499 a ni a; Aizawlah factory 30, Lungleiah factory 24, Champhaiah factory 24 leh Kolasib-ah factory 35 din theih a ni ang.

Flatted factory complex lungphùm phúmna inkhawm IGC, Luangmualah buatsaihah Dr R Lalthangliana chuan, flatted factory complex kaltlangin miin awlsam zawkin industry an din theih phah tur thu leh, industry din thar duhte’n in leh hmunhma buatsaihna atana sum tam tak an sên ngai ṭhin chu a chhâwk zângkhai dawn thu a sawi.

Commerce & Industries Minister chuan, flatted factory complex dinna tur sum zinga 90% chu sorkar laipui tum a ni a, 10% chu Mizoram sorkar tum a nih thu a sawi a; factory complex pali chuan Mizoram pum factory hmun awl 113 a siam tur thu sawiin, "Nasa zawka industry hmanga sum lak luh a, economy chawi kâng turin department leh a thawhpuite bakah entrepreneur-te'n ngaihtuahna seng zel se," a ti.

Commerce & Industries director Florence Zotluangpuii'n flatted factory complex pali din dan tur chanchin a sawifiah bawk.