Vanglaini - Zanin dar 7-ah Aizawl FC Vs Chanmari

KHAWTHLIR

Vawk lak luh khap

Lunglei District Magistrate chuan Cr.PC Section 144 hmanga hriattirna chhuahin, Lunglei district aṭanga vawk thawn chhuah leh district dang aṭanga vawk lak luh khap a nih thu a tarlang. Thupek hi Mizoram ṭhenawm state/ramah vawk natna - PRRS leh African Swine Fever a lên vanga ni a; vawk thi reng reng ṭha taka phûm tur a nih thu te, vawk hrisel ṭha chauh talh tur a nih thu leh, vawk damlo chu hralh loh tur a nih thute a tarlang bawk.

Thisen pe

Mizo Higher Secondary School NSS unit chuan nimin khan Aizawl Civil Hospital tan thisen unit 98 an pe a, a petute mipa 74 leh hmeichhia 24 an ni.

Fihlîm turin chah

Mizoram Youth Commission (MYC) chairman Dr Vanlalṭanpuia, MLA chuan nimin khan a bial chhunga Baptist Higher Secondary School-in Ṭhuamluaia Muala Annual School Sport vawi 59-na an hman ṭan a hawng. MYC Chairman chuan, zirlaite chu HIV/AIDS hlau tura chahin, natna tihdam theih loh laka an him theih nan ruihhlo hman sual leh mipat hmeichhiatna hman khawloh laka fihlim turin a chah a; India rama intihsiakna ṭha ber bera lut pha tura competitive mind pu turin a fuih bawk.

Nungcha humhalhInzirtir a ni

National Wildlife Week, 2019 hman mek pualin nimin khan Khawzawl Wildlife Division leh Champhai Forest Division chuan Khawzawlah nungchate humhalh pawimawhzia inzirtirna, 'Awareness campaign on protection of wildlife' an buatsaih. He hunah hian Khawzawla YMA branch hrang hrang, Khawzawl Group YMA, Khawzawl Joint YMA, Khawzawl Joint V/C-a office bearer-te leh, Khawzawla zirna-in palia zirlaite an tel.

No Tobacco Week

Pentecostal Youth Department (UPC NEI), Chhimtuipui district chuan an conference rorel (No Tobacco to PYD) bawhzuiin October 1-6, 2019 chhung khan No Tobacco Week an hmang. Week hi October 1-ah hawngin, Pathianni khan an khâr a ni. No Tobacco Week chhung hian Chhimtuipui district chhung bial paruka khaw chhung lûn laiah vaihlo leh a kaihhnawih ṭhat lohna lam Mizo, Mara leh Lai ṭawnga ziah signboard an tár a, poster, phamplet leh no tobacco signage chi hrang hrang an sem bakah, slogan inziahsiak an buatsaih.

DAWNTISEI

Zanin dar 7-ah Aizawl FC Vs Chanmari

Mizoram Premier League season ṭantirh aṭanga season tin la inlan thei pahnih Aizawl FC leh Chanmari te chu zanin dar 7:00 hian Lammualah an inhmachhawn dawn. I League club hian MPL8-ah hneh loh la tawng lo mah se Chanmari FC nena an inthlauhna erawh point khat chauh a ni.

Club tlo ve ve

MPL club pahnih AFC leh Chanmari te hi season ṭantirh aṭangin champion rinkai an ni phak zel a, an pahnih chiah hi relegate miah loa MPL season riat khelh tawha inlan vek thei an ni.

Aizawl FC coach Standly Rozario chuan, "Chhinga Veng, Electric Veng leh Mizoram Police kan hmachhawn tawh a, club ṭha vek an ni. Tunah Chanmari kan hmachhawn leh dawn a, anni nena kan inkhel hi chu derby-a chhal theih a ni," tiin Vanglaini a hrilh.

Tu nge lian zawk?

Chanmari FC hian H. Vanlalthlanga hoin bul an ṭan ṭha zawk a, MPL2-ah an champion. Amaherawchu K. Malsawmkima hoin Aizawl FC an rawn harh thara I League hial an tlin hnuah kum zawnin an champion.

MPL5-ah Lalsangzuala Hmar hoin Chanmariin nomawi an chawi leh a, an nomawi chawi zat a intluk chiah. Season liam ta khan Gift Raikhan hoin Aizawl FC an champion a, tunah chuan I League club an lian ta zawk.

Inngam tawk

Chanmari FC-in ropuina neih let tumin an champion hmasak ber ṭuma player pawimawh MS Dawngliana leh H. Lalmuankima bakah hmabak nei êng player eng emaw zat an lalut. S. Malsawmtluanga kaihhruai team hi transfer laia che na bera ngaih an ni.

Mama hote hian MFA Super Cup final an thleng a, I Day Football-ah group stage pel lo mah se Aizawl FC hi 3-1 in an sawp. Tun ṭumah pawh hian match hnuhnung bera Chhinga Veng nena an inhnehtawk ṭuma inlan lo - Dawngtea, Lalnunzama leh Hmingthanmawia te an inlan thei dawn.

Chanmari manager Lalhmangaiha Sailo (Angaiha) chuan, "Dawngtea, Zama, Hmingtea te chhawr theih an ni tawh a, Aizawl FC hmachhawn turin kan inpeih. Kan chak ang," tiin inringtawk takin Vanglaini a hrilh.

Aizawl FC coach Standly Rozario pawhin chak ngei a inring. I League thlenga tawnhriat nei ṭha coach Standly chuan, "I Day Football leh MPL a dang. Kan intawn hmasak ṭum kha chuan kan dinhmun a ṭhat tawh avangin academy naupang enchhinna atan kan hmang a, tunah chuan point thum hmu turin kan khel ang," tiin a sawi ve bawk.

Share this Post

Login to comment

No Comments