Khawthlangtuipui Presbytery inkhawmpui kawng chhe lutuk vangin sawn hlat a ni

October 5-8, 2023 chhung hian Mizoram Presbyterian Kohhrana inkhawmpui lian ber dawttu presbytery inkhawmpui neih tur a ni a, Khawthlangtuipui Presby­tery erawh chu kawngpui chhe lutuk vangin a hun pangngaiah inkhawmpui an nei thei dawn lo a, November 2-5, 2023 chhunga neih turin an sawn.

Presbytery inkhawmpui hi October thlaa Pathianni vawi hnihna behchhanin neih a ni ṭhin a, kumina inkhawmpui hun chu October 5-8 a ni a, presbytery ṭhenkhatah chuan October 6-ah an ṭan dawn a ni.

Tlabunga kohhran hruaitute chuan Vanglaini palai zawhna chhángin, Tlabung panna kawngpui NH-302, a bikin Lungsen leh Tlabung inkar a chhe hle tih an sawi a, "Lungsen leh Tlabung inkar hi km. 40 a tling lo a, vanduai chuan ni hnih thangte a ngai. Kawng a chhiat lutuk avangin motor an kal duh lo a, palai kal turte'n motor hman tur an hre lo. Chuvang chuan, November 2-5, 2023 chhunga neih turin sawn hlat a ni," an ti.

Presbytery inkhawmpui sawn chungchang chu presbytery puipate'n an sawiho hnuah sawn hlat mai ṭha an ti a, Synod puipate an ràwn hnuah sawn hlat an titlu ta tih an sawi a; November thlaah chuan khua a tuihul tawh ang a, kawngpui dinhmun pawh a ziaawm tawh an beisei thu an sawi bawk.

Khawthlangtuipui Pres­bytery-ah hian pastor bial panga - Tlabung Zodin, Tlabung Chawnpui, Chawngte-L, Chawngte-P leh Lungsen bialte a awm a; kumina presbytery in­khawmpui hi Tlabung Zodin Kohhran biak-inah nghah a ni ang. Inkhawmpui sawn a nih thu hi October 3, Thawhlehni khan an puang a ni.