Mizoram Premier League Season 8-ah Chawnpui FC chiahin point an hlawh chhuak tawh lo a, HC Zarzoliana hote hian vawiin tlai dar 4:00 hian FC Venghnuai an hmachhawn dawn.

MPL hmasa bera Dinthar champion puitu Zara chuan, "Kan vanduai a kaltluang deuh a ni. Venghnuai nen hian Thlamuana kan chhawr thei dawn lo. Kan striker lak thar Bawihpuia pawh CRS-ah an la approve hman lo a nih chuan hman theih a ni lo ang. Amaherawhchu point kan mamawh tawh a, Venghnuai lakah hian point kan hmu ngei tur a ni," tiin Vanglaini a hrilh.

Chawnpui hian an match hnuhnung berah Electric Veng 3-1 in an hneh lo a, chak lo nasa angin lang mah se an vanduai. Electric Veng coach Lalsangzuala Hmar pawhin, "Goal aṭanga en chuan sawp pawh a ni thei ang, inkhelah erawh sawp a ni lo. Chawnpui kha an goal nawr a na a, an vanneih ṭumah chuan chak zawk thei an ni," tiin result-in a sawifiah loh thu Vanglaini a hrilh.

Zara hian tlarhmaah Lalnunmawia, Moody Lalawmpuia, Jerry F. Zonunsanga bakah Larry Lalrinawma te chhawr theih turin a kawl a, Venghnuai laka point hmu thei turin an ṭha tawk.

Chutihrualin Venghnuai hi kai thar ni mah se player neih dan thlirin squad buk rit zawk an ni. Coach Rindika Hmar-in, "Point thum hmuh kan tum," tiin a sawi a, an chak zo lo a nih chuan pawi an ti khawp ang.

Venghnuai hian vawiin tlai hian Luangmual FC tana hming chher tawh PC Zosanga leh Bethlehem Veng FC tana khel tawh Lalmuanzova te an hmang thei dawn. Zara aiin Rindika'n duhthlan tur a ngah zawk a, hneh loh la tawng lo leh ṭantu nei ṭha Venghnuai tan tun hi dinhmun siamṭhatna hunṭha a ni.

Share this Post