CYMA-in ruih hmang, eirûk chíng vote lo ngam turin mipui an chah

Central YMA chuan nimin khan kumina Mizoram inthlanpui awm tur pualin inthlan thuchah an tichhuak a; manifesto-ah a taka tihhlawhtlin theih ngei tur chauh tarlang tura political party-te an ngen bakah, zu ruih hmang, eirûk chíng leh nungchang thlahdahte vote lo turin mi tin an chah.

CYMA chuam, India ram puma entawn tlak inthlanna felfai leh muanawm MIzoramah a awm leh ngei theih nan inthlan thuchah an tichhuak tih an tarlang a, "Inthlan thuchah hi ngai pawimawh a, zâwm ngei turin Mizoram mipui leh political party tin kan ngen a ni," an ti.

Election manifesto chungchangah CYMA chuan, "Party manifesto-ah a taka tihhlawhtlin theih ngei tur chauh tarlan ni se," an ti a; candidate-te chu ram hruaitu tur an nih thu tarlangin, "Zu ruih hmang te, eirûk chíngte leh nungchang thlahdahte an awm palh a nih pawhin vote loh ngam ni se," an ti bawk.

CENTRAL YMA INTHLAN THUCHAH

1. Ram rorelna hi mipui siam a ni a, a chhiat a ṭhatah mawhphurtu kan ni tih hriain, khua leh tui dik takte chu vote thlak ṭheuh turin kan ngen.

2. Mizo hnahthlak zingah chibing/kohhran bil inthliar hrang zawnga chêtna hi CYMA chuan ṭha a ti lo. Chutiang záwnga hma la lo tur leh chibing/sakhaw bing puala candidate siam lo turin political party leh mipui kan ngen.

3. Political party-te leh party official candidate-te'n khawtlang huapa ruai siam hi CYMA chuan ṭha a ti lo a, khawtlang huapa ruai siam lo turin kan ngen.

4. Aurinna hman chungchangah, political party tinte'n sorkarin a phal dan ang bak leh khawtlang tana ninawm leh hnawksak thei tur ang chi chu tih loh ni se.

5. Candidate-te hi ram hruaitu turte an nih avangin zu ruih hmang te, eirûk chíngte leh nungchang thlahdahte an awm palh a nih pawhin vote loh ngam ni se.

6. Naupang kum tling lo leh thil kalphung hre pha lote inthlan boruaka hnuh luh loh leh hmanruaa hman loh ni se.

7. Party manifesto-ah a taka tihhlawhtlin theih ngei tur chauh tarlan ni se.

8. Inthlanna muanawm, boruak ṭha tak hnuaia kan neih theihna turin thlangtu mipui leh mawhphurtu zawng zawng theihtawp chhuaha ṭan la turin kan ngen.

9. Hmanraw thianghlim lo chelekna rêng rêng kan duh lo a, mi tinin an chhia leh ṭha hriatna thiang leh zalên tak hmanga vote an thlâk theih nan sum leh therhlo dang hmanga vote lei leh hralh loh ni se. Mipui, pawl leh kohhrante pawhin party leh candidate-te sum leh thil dang dil loh ni se.

10. Social media hrang hrangah thu belhchian dâwl lo leh finfiahna awm lo ang chi party hamṭhatna atana thehdarh loh ni se.