Manchester khawpui a ngui

Pathianni zan Premier League inkhelah hmahruaitu Liverpool duhthusamin result a thleng. Champion lai Manchester City chu an mikhual Wolverhampton Wanderers lakah 2-0 in an tlawm a, Manchester United-in St James Park-ah mualneitu Newcastle United 1-0 in an hneh lo bawk.

Reds hi match riat khelh tawhah Man City aiin point riatin an sang a, Man United nena an inhlauhna phei chu point 15 zet a tling. Red Devils hian kum 30 chhunga league an ṭan chhiat ber ṭum an tawng a, zahna kawn zawh mek Ole Gunnar Solskjaer hoten October 20-ah Liverpool an mikhual dawn avangin thim thuah hnihin a hmuak.

Wolves tan Traore

Etihad Stadium-ah Manchester City-in Wolves lama goal engzat khungin nge point thum an hlawh chhuak ang tih chu inkhel hmaa zawhna a ni a, inkhelh banah erawh mikhual hi Adama Traore goal hnih hmangin an chak.

Pep-a hoten ball possession 76% zet a nei a, goal khung tumin vawi 18 zet attempt nei mah se goal khatmah an khung lo. Wolves-in an barakhaih a, minute 80-naah counter attack hmanga vaw letin Raul Jimenez-a'n City defender Nicolas Otamendi bumin Adama Traore tan a pe a, Barcelona academy chhuak hian 'cool' zetin a khung.

Adama Traore bawkin injury time-ah City tlarhnung a pal darh a, goal khatna a khungna laiah bawk mawi zetin a pet goal. Wolves-in Traore hmangin hnehna an chang a, an sawi zui erawh Man City leh Liverpool a ni daih thung. 

Champion tura rinkai Pep Guardiola hoten tun season-ah point riat an hloh tawh a, Premier League la champion ngai lo Liverpool tan nomawi beiseina a nung thar hle.

Beiseina a awm

Premier League ṭan hnua match riat zawha league hmahruaitu la fal ber ṭum a ni. 2014-15 season khan Jose Mourinho kaihhruai Chelsea-in point ngain hma an hruai a, kum tawpah pawh chiang takin an champion.

Pep Guardiola erawh beisei a la bo lo, Man City manager chuan, "Ka naute theihna hi ka hrechiang a, an la ti thei. Kan inkar a hla tih ka hria a, team pakhat fal na zat hi kan tan hriat loh a ṭha zawk. October thla chauh a ni a, khelh tur la tam," tiin champion nomawi humhim a la inbeisei hle.

Kumin January thla khan Liverpool-in Man City lakah point sarihin hma an hruai a, kum tawpah erawh pahnihna an ni. Reds hian tun hma pawhin Krismas laiin hma an hruai tawh ṭhin a, amaherawhchu Premier League nomawi an la chawi loh avangin October thlaa champion tur sawi a la rem lo.

United an hnufual

Big six zinga chhiar tel Manchester Untied-in an khelh danah club lian an nihna an pholang thei lo a, Newcastle United an hneh loh avangin table-ah 12-naah an awm. Newcastle goal awmchhun hi minute 72-naah Matty Longstaff-a'n mawi zetin a khung a, kum 19 mi hi Premier League-a a bul ṭanna hmasa ber a ni.

Longstaff-a u Sean chu season ṭan hmain United-in lak an tum tawh a, Ole Gunnar Solskjaer hote hnehtu Newcastle team-ah hian an unau hian an khel ve ve. Manchester United tana lungchhiatthlak lai erawh Newcastle-in chak an phu zawk.

Norwegian manager Solskjaer hnuaiah hian United-in match hmasa pakuaah khualmualah chak nghal mah se tunah erawh match hnuhnung 11-ah khualmualah chak an nei lo. United keeper David de Gea chuan, "Pawm dam theih loh," tiin an khelh dan chungchang a sawi a, Premier League-a club ropui ber hi an talbuai mek.

Solskjaer hian United-a hna nghet a neih hnuah Premier League match 16-ah point 17 chiah a hlawh chhuak a, ban theih dinhmunah a ding. United manager hian Newcastle an hneh loh zawhah ngaihdam a dil a, club thuneituten a chungah zahngaihna an lan dawn erawh hunin a hril ang.



Share this Post

Login to comment
No Comments