Aizawlah Ruihhlo Do Kawng Zawhpui

Working Committee on Ruihhlo Do chuan nimin khan Aizawlah Ruihhlo Do Kawng Zawhpui an huaihawt a, zirlai ṭhahnem tak telin, Social Wel-fare & Tribal Affairs minister Lalrinawma'n a hmanpui.

Kawngzawh hi Millen-nium Centre kawt leh Sikul-puikawn aṭanga ṭan a ni a, Raj Bhavan lam pana kalin, Raj Bhavan bulah an intâwk khawm a, inkhawm buatsaih a ni.

Kawng zawhnaah hian zirlaite chu ruihhlo ṭhat lohzia leh ruihhlo zuartute chu ram leh hnam hmelma an nih thu te, ruihhlo tel loa ram nuam siam tura ṭan rual a pawimawh thu te, ruihhlo man kawngah sorkar ṭawiawm a pawimawh thutein an au rual a ni. Ruihhlo leh a kaihhnawih laka inhnamhnawih lo tur leh ruihhlo donaah theihtawp chhuah turin thutiam an sawi rual bawk.

SWTA minister Lalrinawma chuan, ruihhlo donaa hmalakna mipuiin an thláwp ṭha chu ropui a tih thu a sawi a, "Nunna hlu tak chhan nan ruihhlo do a ṭul. Mi aia nawm tumna thlahlel loin, kan nawm theih dan tur bera Pathianin min siam dan leh hemi mila ruahmanna a siamte zah thiam ang u," tiin, ruihhlo donaa ṭan rualpuiah kal khawmte a sáwm.

Raj Bhavan kawta inkhawmah Excise & Narcotics joint commissioner Vanlalmal-sawmdawngliana, Central YMA president R Lalngheta, Lalduhawma Chawngthu, MZP aiawh leh MSU aiawhte'n thu an sawi a ni.