Mizoram inthlanpui neih turah vote thlâk thei mi 8,51,895 an awm

Kumin Mizoram Legislative Assembly inthlanpuia hman tur electoral roll chu nimin khan district hrang hrangah district election officer (DEO)-te'n an tlangzarh a; kumin inthlanpuiah vote thlak thei mi 8,51,895 an awm. Voter zinga pakhat chu mipa leh hmeichhia ni lo ve vea inchhál (third gender) a ni.

Electoral roll tlangzarhnaah hian Election kaihhnawih sorkar official-te leh political party aiawhte an tel a, DEO-te chuan political party hrang hrang hnenah electoral roll hard copy leh soft copy an hlan a ni. Electoral roll tharah hian October 1, 2023-a kum 18 pumhlûm chin thun a ni.

Final electoral roll thara a lan danin, Mizorama voter mi 8,51,895 zinga 4,12,969 chu mipa an ni a, mi 4,38,925 chu hmeichhia an ni; mipa aiin hmeichhia 25,956-in an tam. Roll ennawnna tura draft roll tihchhuah aiin final electoral roll-ah hian voter 13,856 (1.65%)-in an tam zawk.

Electoral roll-ah hian Lunglei district-ah mipa leh hmeichhia ni loa inchhál (third gender) pakhat a awm anga tarlan a ni a, mahse, Mizoram Election hotute chuan tihsual palh a ni a, mipa a nih thu an sawi.

Mizoram electoral roll tharah service voter 4,973 awmin, mipa 4,884 leh hmeichhia 89 an ni a; Mizoram pumah polling station 1,276 a awm bawk.

Aizawl district electoral roll chu bawrhsap leh DEO Nazuk Kumar-i'n DC Conference Hall-ah a tlangzarh. Aizawl district-ah Assembly constituency 13 a awm a, chu'ngah chuan voter 2,86,807 awmin, mipa 1,34,249 leh hmeichhia 1,52,558 an ni.

Lungleiah chuan DEO Ramdinliani, bawrhsapin DC Conference Hall-ah Lunglei district electoral roll thar a tlangzarh a, DEO pisa leh Lunglei Writers Association ten SVEEP hnuaia 'Vote thlak hlutna' tih thupui hmanga essay inziahsiak an buatsaiha ti ṭhate hnenah lawmman hlan a ni.

Lunglei district-ah hian assembly constituency paruk - Lunglei North, Lunglei East, Lunglei West, Lunglei South, Thorang leh West Tuipui a awm. Electoral roll tharah hian voter 1,00,136 an awm a, mipa 49,644 leh hmeichhia 50,491 an ni a, transgerder pakhat a awm bawk. Draft electoral roll aiin voter 1,620 (1.64%)-in an pung.

Siaha DEO Lalhmunsanga Hnamte chuan DC conference room-ah an district electoral roll a tlangzarh. Siaha district-ah hian Assembly constituency pahnih - Saiha leh Palak a awm a, bial pahnihah hian voter 44,489 awmin, mipa 21,614 leh hmeichhia 22,875 an ni a; Saiha bialah voter 24,126 leh Palak bialah voter 20,363 an awm.

Champhai DEO James Lalrinchhana chuan DC Conference Hall-ah Champhai district electoral roll a tlangzarh a; tlangzarhnaah sorkar official, political party leh MJA hruaitute leh tlawmngai pawl aiawhte an tel.

Champhai district-ah MLA constituency pathum - Champhai North, Champhai South leh East Tuipui-te awmin, polling station 84 a awm a; bial pathumah hian voter 57,180 awmin, mipa 27,880 leh hmeichhia 29,300 an ni a, draft roll-ah aiin voter 742 (1.3%)-in voter an tam zawk.

Kolasib district electoral roll chu DEO John LT Sanga'n DC Conference Hall-ah a tlangzarh. Kolasib district-ah Assembly bial pathum - Tuirial, Klasib leh Serlui-te a awm a; district pumah voter 63,462 awmin, mipa 30,603 leh hmeichhia 32,859 an ni a, draft roll aṭangin voter 803 (1.28%)-in an pung a; service voter 403 an awm. Polling station 89 a awm bawk.

Serchhip DEO David Lalthantluanga pawhin DC Meeting Hall-ah electoral roll thar a tlangzarh. Serchhip district-ah hian bial pathum - Serchhip, Tuikum leh Hrangturzo-te awmin, polling station 88 a awm a; voter 54,152 awmin, mipa 26,265 leh hmeichhia 27,887 an ni a, service voter 413 nen district puma vote nei zat chu mi 54,565 an ni. Final roll-ah hian draft roll aiin voter 339-in an tam zawk.

Lawngtlaiah chuan DC Conference Hall-ah deputy DEO Abraham Beirazi Khithie-in electoral roll a tlangzarh a, voter 1.88%-in an pung. Lawngtlai district-ah hian constituency pathum - Tuichawng, Lawngtlai West leh Lawngtlai East a awm a, voter 91,439 awmin, draft roll aiin 1,690-in an tam.

Tuichawng bialah voter 36,042 awmin, Mizorama Assembly constituency zinga voter tamna ber bial a ni a, Lawngtlai West-ah voter 29,493 leh Lawngtlai East-ah voter 25,904 an awm. Service voter 232 an awm bawk.

Mamit DEO VL Remliana'n DC Conference Hall-ah Mamit district electoral roll a tlangzarh. Mamit district-ah bial pathum - Hachhek, Dampa leh Mamit-te a awm a; voter 64,787 awmin, draft roll-a viter zat 63,688 aṭangin 1,099-in an pung. Voter zingah Election Commission of India-in kum upa (senior citizen) a pawm chin kum 80 leh a chung lam mi 765 an awm bakah, pianphunga rualbanlo mi 64 an awm a ni.

Saitual DC conference hall-ah bawrhsap leh DEO Dr Lalngura Tlau-in electoral roll a tlangzarh a, DEO-in thu a sawi bakah, election officer Laldinfeli'n electoral roll thar dinhmun tlangpui a sawi. Saitual district hian Assembly constituency pathum huam mah se, a huam kim vek lo a; voter 55,674 awmin, mipa 27,572 leh hmeichhia 28,102 an ni a, draft roll aṭangin voter 574 (1.04%)-in an pung. District chhungah polling station 80 a awm bawk.

Khawzawl bawrhsap K Lalrohluna'n DC Conference Hall-ah Khawzawl district electoral roll a tlangzarh. Khawzawl district-ah Assembly bial pakhat, Tuichang a awm a, electoral roll tharah hian voter 17,475 awmin, mipa 8,697 leh hmeichhia 8,778 an ni. Roll ennawnnaah voter 532 thun belh a nih laiin, voter awm sa 497 paih a ni a, final roll-ah hian voter 35 (0.20%)-in an pung. Service voter 97 an awm.

Hnahthial DEO Chuauhnuna pawhin an district-a assembly constituency awm chhun South Tuipui bial electoral roll a tlangzarh a, political party aiawhte hnenah copy hnih ṭheuh a hlàn. Hnahthial district-ah hian voter 16,294 awmin, mipa 8,037 leh hmeichhia 8,257 an ni a, service voter 87 nen vote nei mi 16,381 an awm. Draft roll aiin voter 419-in an tam a, a punna chu 2.64% a ni.