Federer-a'n Murray a lawmpui

Roger Federer chuan tun hma lama a elpui ṭhin Andy Murray-a'n singles match a khelh leh thei ta chu a lawmpui thu a sawi a, player pahnih hi tun kar chhunga khelh tur Sanghai Masters-ah a inlan ve ve ang.

Britain tlangval Murray hi a khel bawr na vawi hnih zai a ni tawh, tun hnaiah a hliam dam tawhin singles huangah pawh a inlan ve thei tawh. Nomawi la chawi leh rih lo mah se player ṭha dangte elphak turin a inbuatsaih mek.

World number 3 Federer chuan, "Ṭha taka a inkhel leh thei ta hi a lawmawm hle, ani a rawn kir leh thei ta hi tennis ngainatute tan chuan chanchin ṭha leh lawmawm chu a ni.

"Andy hi a thawkrimin a huaisen em em a, player dangte entawn atan pawh harsatna hneha a inkhel leh thei ta hi a ṭha hle. Ka hmuh dan chuan match tinin hma pawh a sawn chho zel," tiin a sawi.

Grand Slam vawi 20 champion tawh Federer hian season kal laiah major title lak a nei lo, vawiin hian Sanghai Masters lama a match hmasa ber atan seeded chang phak lo Albert Ramos Vinolas nen an intawng ang.



Share this Post

Login to comment
No Comments