AP ramriah ITBP intelligence post siam dawn

Sorkar laipui chuan India leh China ramria ramri vil hna ṭha zawk leh thu thar hriatna kawng chak zawk a awm theih nan Border Intelligence Post (BIP) siam a rem tih thu a puang.

BIP te hian Indian Army bakah Indo-Tibetan Border Police te, Intelligence Bureau te, National Technical Research Organisation leh Research and Analysis Wing te nena ṭangkawpin ramri venhimna tihchangtlunna tur hian an thawk dawn a ni.

Central sorkarin a pawm tak, Border Intelligence Posts (BIPs) hi China-in ramria thawm a neih leh ṭhin dodalna atana hmalakna a nih thu sorkar laipui chuan a sawi. BIP zawng zawngte hi Intelligence Bureau official mi pali emaw panga te'n an awm chilh reng dawn a, ramria thil thleng apiang vil tur leh rang taka thuneitu sang zawk hnena thu thlen thei tura beisei a ni.

June 2020-a Galwan valley-a India leh China sipaite intihbuai hnu aṭang khan ram pahnihte ramri boruak hi a ṭha lo chho zel a, ramri ṭhenna mumal tak awm lo leh, Line of Actual Control (LAC) huam chin pawh ngaihdan inang loa inhnial buai fo ṭhin an nih avangin India hian China chet lakna tur dodal nan BIP din hi a ram venhim nan a ṭul thu a sawi.

Tunah hian Line of Actual Control (LAC)-a ITBP-te awmna Border Outpost (BOP) hi 180 chuang a awm mek a, hengte hi Ladakh leh Arunachal Pradesh inkara mi an ni. Kum tirah khan sorkar laipui chuan BOP 47 leh ITBP camp-na tur 12 siam belh a lo remti tawh a, hei hian sipai 9,400, batallion pasarih hen a mamawh ang.