Point thum hmu Arsenal pathumna

David Luiz-a tauh luh hmangin Arsenal chuan an mikhual Bournemouth 1-0 in an hneh a, manager Unai Emery naute hian match riat khelh tawhah point 15 hmuin Premier League table-ah pathumna dinhmun an luah.

Pathianni zan Emirates Stadium-a inkhelah minute kuana lekah Nicolas Pepe corner pet chu Luiz hian a tauh lut a, goal dang lut loin point thum hlu tak an hlawh chhuak - an chungah hmahruaitu Liverpool (24 points) leh Manchester City (16) te chiah an awm.

Gunners an chak

Bournemouth lamin Callum Wilson hmangin siphurh sut theihna hun ṭha an neih chu keeper Bernd Leno-a'n a lo dansak a, Joshua King pawh midfielder Matteo Guendouzi-a'n a lo tih buai hman avangin goal a khung thei lo.

Gunners tan Dani Ceballos leh Bukayo Saka ten mawi taka ball an inpek hnuah Pierre-Emerick Aubameyang-a'n goal a khung teuh hle a, Gabon international hian hun tawp dawnah goal ban a tihper bawk.

EPL match hmasa berah Arsenal hian Newcastle chu 1-0 in an hneh a, a hnuah tun ṭum hi goal an chhuah loh lehna hmasa ber a ni. Mual sir dinglamah Calum Chambers a khel ṭha a, English defender hi goal ven kawngah a thawhhlawk bakah tlarhma lam a pui ṭha hle.

Inpekna rah

Arsenal hi September 30 khan Manchester United nen an inkhel a, Ningani zanah Europa League khelin Pathianni zanah league match an nei zui leh bawk - kar khat chhungin match thum an khel tihna a ni.

Gunners manager Emery chuan, "Kan result leh first half kan khelh dan khan min ti lawm. Inkhel kan thununin kan ti ṭha takzet, Premier League hi chu a hautak avangin vawiin ang khan inpekna sang tak nen kan khelh a ngai," a ti.

Bournemouth manager Eddie Howe chuan, "Ball kan chang tamin hun ṭha kan insiam hnem bawk, point hmuh phu khawp chuan kan khel. Mahse, a tir lam kan khelh fuh loh kan tuar a ni," tiin a sawi.



Share this Post

Login to comment
No Comments