Street vendor nuai 50 chuangin micro-credit scheme chhawr

Covid-19 hri leng avanga mi tam tak eizawnna chhe tur dawmkanna atan 2020-a prime minister Narendra Modi-a hmalakna, Street Vendor's AtmaNirbhar Nidhi (PM SVANidhi) scheme chu street vendor nuai 50 chuangin an chhawr ṭangkai thu sorkar laipui chuan a sawi.

Thawhlehni khan sorkar laipui chuan he scheme kaltlanga loan nuai 66 an pek chhuah hmanga Rs. vbc 8,600 hu loan, a sum faia pek a nih thu a sawi a, loan-te hi street vendor nuai 50 chuangin an chhawr niin an sawi. He scheme kaltlang hian dah kham nei loin Rs. 50,000 thleng loan pek a ni a, a rulh lehna tur pawh 7% subsidy pek niin, sum fai ni loa, digital payment hmang tamte chu kum khatah Rs. 1,200 pek let ziah an ni bawk a ni.

Scheme kalpuitu, Ministry of Housing and Urban Affairs chuan July 1 aṭang khan he scheme chhawr tura tlin an tum zat ennawn lehin campaign te an neih thu an sawi. "Thla thum ral ta chhung khan state hrang hrangte chuan he scheme hnuaiah hian vendor nuai 12 chuang an rawn lak luh belh a ni. Madhya Pradesh, Assam leh Gujarat te chu a tiṭha zual an ni a, a khawpui ang zawng chuan, Ahmedabad, Lucknow, Kanpur, Indore leh Mumbai te chu a thawh hlawk zual an ni," tiin, PM SVANidhi scheme kum thum chhung leka vendor nuai 50 chuangin an chhawr chu an beisei aia a tam thu an sawi.

PM SVANidhi scheme hian street vendor-te dinhmun chawikan a, ram sum leh pai chetvelnaa mumal zawka an tel ve theih dan tur a ngaihtuah a, sum inhlan chhawnna kawng mumal, ṭha leh felfai zawk hriattir chu a tum a ni bawk. Micro-credit pek mai piah lamah hian khawl hmanga sum inpek hmanga street vendor-te tihchangtlun chu a tum ber a ni.