Firfiaka chetna kaihhnawihah journalist man

Delhi police-te chuan October 3 khan chanchinthar buatsaih ṭhin, Newsclick Editor-In-Chief leh an human resources head, Amit Chakraborty te chu firfiaka chetna kaihhnawihah thubuai siamsakin an man.

Deputy Commissioner of Police (PRO), Suman Nalwa chuan rinhleh thilah he news portal-a thawk mi 46 te chu thu zawh fiah an nih thu a sawi a, an zingah hian hmeichhe pakua an tel. Heng mite hi China nen inzawmna nei leh thawkho nia hriat an ni

Delhi police-te hian October 3 khan NewsClick hnuaia hnathawk, journalist, ziaktu, lem ziak leh a kaihhnawiha hnathawk hrang hrangte in leh office an luh chhuah a, journalist-te chu Delhi-a hnam leh hnam inkara buaina chhuak bakah 2019-2020-a Citizenship Amendment Act (CAA) dodalna kawng zawh te, 2020-2021-a lo neitute nawrhna chungchangte zawh fiah an ni. News portal-a thawktute phone leh laptop te chu an hrensak vek bawk. Thu zawh fiah zinga pakhat chuan zing kara police-te'n a in an luhchhuah hnuah CAA dodalna atana nawrh a nih hunlaia hmun pakhat, Delhi-a Shaheen Bagh a tlawh chanchin an zawh thu a sawi. Midang erawh chuan Jawaharlal Nehru University (JNU)-a politics avanga zirlaite buainaa a inrawlh ve leh ve lohte an zawh thu a sawi ve thung.

August 17 khan Delhi Police special cell chuan he case kaihhnawihah hian Unlawful Activities (Prevention Act) (UAPA) hnuaia section 13,16,17,18 leh 22 hmangtein FIR an theh lut tawh a, heng act-te hian hel pawl puihna tura atana sum khawn leh thuhretu vau behna te a huam a ni. FIR-ah hian Indian Penal Code (IPC) section 153A leh 120B te pawh ziah tel niin, pawl pahnih inkara sakhaw thila inhuatna tuh leh thil sual ti tura ruahmanna neihte hremna tur a ni bawk. FIR hi The New York Times-in August 8-a NewsClick portal-in Chinese propaganda thehdarh tura hma latu; American sumdawng, Neville Roy Singham hnen aṭanga pawisa an dawn thu an sawi aṭanga theh luh a ni. Enforcement Directorate (ED)-te pawhin NewsClick hi kum 2021 aṭang khan an chhui tawh thu sawiin, kum 2018-2021 inkarah khan India ram pawn lam aṭangin Rs. vbc 77 an dawn thu an sawi a, pawisa an chheprelh niin hriat a ni.

Hetih lai hian Editors Guild of India (EGI) chuan journalist man an nih chungchangah hian thuchhuah siamin,"Media-te ka hup tumna atana beih an nih avang hian EGI chu kan rilru a na hle. Thil tisual an awm a nih chuan dan chu a nih dan tur anga kalpui mai tur a ni. Thil ṭhenkhat chhuina kawnga thil tihdan avanga dan felhlel tak, hlauhna rilru tuh thei ang chia chetna hi kan dem a, kan duh sawi tura zalenna kan neih leh lungawi lohna sawi tura kan beihna hi eng dan mahin a phuar tur a ni lo," tiin an tarlang. INDIA pawhin thuchhuah siamin,"Media-te hi kan thlawp tlat a, constitution min pek zalenna hi kan ṭan chhan a ni," tiin BJP-in media mi an bei chu an dem thu an sawi bawk.