China Open champion Thiem

Pathianni zan khan China Open mipa singles final khelh a ni a, seeded pakhatna Dominic Thiem chuan set hmasa a hloh hnuah Stefanos Tsitsipas chu 3-6, 6-4, 6-1 a hnehin a champion.

China khawpui Beijing-a inkhelah Thiem hian a khingpui service vawi nga a chhuhsak a, Greek tlangval Tsitsipas erawhin break point vawi riat a hmuh zinga pathum chiah a chhawr ṭangkai thei thung a ni.

Kum 26 mi Thiem chuan, "Inelna hmachhawn tur hian inbuatsaihna ka nei ṭha hle, final inkhel harsa takah a che fuh zawka ka ṭang hi a lawmawm hle," tiin a sawi. Austrian tlangval hian tun season chhungin nomawi pathum a chawi tling ta chiah a, tennis a khelh hun chhungin title 15 a lakna a ni bawk.

China-ah hian tennis inelna neih chhunzawm zel a ni dawn. Tun kar chhung hian Shanghai Masters khelh chhunzawm leh nghal a ni dawn a, world number 1 Novak Djokovic pawh a inlan dawn. Serbian tlangval hian a match hmasa berah Denis Shapovalov a hmachhawn ang.



Share this Post

Login to comment
No Comments