Chelsea an chak chiang

Season bul ṭan ṭha lo mah se Chelsea an insiamrem zel tih khelmualah a lang a, Pathianni zan khan Southampton chu khualmualah 4-1 ngawtin an sawp. 

Blues tan Tammy Abraham leh Mason Mount ten goal an khung hnuah Saints hian Danny Ings hmangin sut ve leh mah se Chelsea chhaih kawlhna goal mai a ni. 

First half-ah la la N'Golo Kante chuan an goal thumna a rawn khung zui ve leh a, Michy Batshuayi chuan minute 89-naah chak nemnghehna a khung ve leh bawk. 

Batshuayi goal khung hi Frank Lampard laka tla tlum lo USA captain Christian Pulisic siamsak a ni a, 'Batman' tia hminglem an pek Batshuayi hian social media lamah, "Captain America chuan Batman a pui," tiin a tarlang. 

Jorginho che tla chu Chelsea fan-te tan thlir ninawm loh a ni a, Italian midfielder hian a pass zinga 86% chu a pass dik a, midang zawng aiin an khingpuite ball ken lai a chhuhsak hnem bawk.

Chelsea hian inelna hrang hranga an match hnuhnung paliah hnehna an chang vek a, inrintawkna nasa tak an neih belh ang. 

Blues manager Lampard chuan, "Inkhel bul kan ṭan ṭha hran lo a, mahse Abraham khan a hun takah goal a rawn khung a ni. Kan theihna sang berin kan khel chhuak lo a, kha aia la khel ṭha thei kan ni," a ti a, a lawm tawk lo. 

Lampard chuan an tihsual sawi zuiin, "2-0 a hma kan hruai tawh a nih chuan 3-0 thei mai tur kan ni a, mahse kan fimkhur lo. Kha aia tlarhnung kha khawng tur a ni," tiin a sawi. 



Share this Post

Login to comment
No Comments