Mumbai City an tlawm leh tawh

Indian Super League club Mumbai City chu Thawhlehni zan khan AFC Champions League match-ah an tlawm leh ta a, an mikhualna ramah Navbahor chu an ngam lo - ISL league winner hi Uzbek club ṭha lakah 3-0 in an tlawm.

Mumbai hian an match hmasa zawkah Nassaji Mazandaran chu 2-0 in an lo ngam lo tawh bawk a, match hnih khelh tawhah an la tlawm ve ve avangin last 16 a har ṭalh tawh dawn - an la hmachhawn loh team hi Neymar neitu Al Hilal an ni tih theihnghilh lo la!

Marzakiy Stadion, Namangan, Uzbekistan-a inkhelah Islanders (Mumbai sawina) hian minute 43-naah penalty hlawh chhuakin goal hmahruai khungna remchang an nei a, mahse, Rangers forward hlui Greg Stewart chuan goal-ah a chantir thei lo!

Goal lut loin chawlhlawk hman zui a ni a, Mumbai-in an chance neih an chhawr theih loh an tuar zui bawk. Jamshid Iskandarov, Jasur Yakshiboev leh Doniyor Abdumannopov ten second half-ah Uzbek club tan goal an rawn khung a, 3-0 in Mumbai an tlawm.

Mumbai City tan Lallianzuala Chhangte leh Lalengmawia Ralte (Apuia) ten inkhel bul an ṭan a, danglamna erawh an thlen thei bik lo. AIFF Player of the Year ni lai Lianzuala chuan, "Penalty aṭangin chance kan nei a, kan hun neih kan chhawr lo kha a pawi a ni.

"First half-ah bul kan ṭan ṭha viau a, second half-ah duh aiin min thlak hma. Kan group-a awm club-te hi AFC Champions League-a sulhnu nei ṭhate an ni a, nikum nen phei chuan khaikhin chi pawh a ni lo.

"Chutihrual chuan game-ah kan hneh loh bik êm êm a awm ngai lo a, kan vanduai ve ṭhin bawk a ni," tiin Vanglaini a hrilh a, Asian football-a club inelna sang berah Indian football club ke a la hmui thei lo a ni ber.

Mumbai hian vawiinah Uzbekistan chhuahsanin India an rawn pan a, Pathianni zan hian ISL-ah Kerala Blasters an mikhual zui ang. October 23-ah Champions League match an khel leh ang a, Al Hilal chu khualmualah an lenchilh dawn a ni.