Khawhai leh Kanan an champion

JJS Trucking Bharatbenz Inter Village Volleyball Tournament 2023 chu Zirtawpni zan khan a hmawr bawk a ni. Mipa inelna huangah Kanan an champion a, hmeichhe lamah Thenzawl East an thiam ber bawk.

R. Dengṭhuama Indoor Stadium, Mualpuia inkhelah Khawhai hian Hunthar chu 3-1 (12-25, 25-15, 25-13, 25-21) in an hneh, a vawi khat nan ram pum huapa khua leh khua, veng leh veng inelnaah an champion.

Khawhai an champion theih nana player hmunawm leh ṭangkai Lalhmunmawia chu best spiker atan thlan niin, spiker ten an vuak thlak tur lo siamsak ṭhintu G. Lalramdinmawia, Khawhai bawk chu best setter atan thlan a ni bawk.

Pro Volleyball League club nei veng Hunthar erawh a vanduai zawk niin, tun hma lama an ropuina ang nei rih lo mah se volleyball thiam leh ngaina veng an la ni reng tih erawh a takin a lang.

Hmeichhe inelna lamah Thenzawl East chuan Kolasib Diakkawn chu 3-1 (25-22, 17-25, 25-22, 25-13) a hnehin an champion bawk a, an player pahnih Lalmuanpuii (best spiker) leh Lalrinzuali (best setter) ten mimal chawimawina an dawng bawk.