CAM budget atan ₹23,90,83,500

Cricket Association of Mizoram (CAM) chuan September 30, Inrinni khan Aijal Club-ah Annual General Meeting a nei a, he hunah hian kum 2023-24 budget atan Rs 23,90,83,500 pawm a ni.

Honorary president Lalrochuanga kaihhruai hian, Mizorama cricket a lo ṭhanlen zelna atan Grassroots Cricket a ngaipawimawh a, hemi atan hian Samagra nena ṭangrualin pawisa hman tur atan Rs 50,00,000 dah a ni.

Hmunhma (infra-structure) tihchangtlun nan Rs 10,00,00,000 dah niin, season lo awm tur atan hian club tinte inrelbawlna turin CAM chuan sum ṭhahnem tak a dah bawk a, academy-a naupang zirlai 25 nei chinte tan Rs 4,00,000 a dah.

CAM hian honorary secretary thar atan P. Lalremruata, Chaltlang an thlang. Honorary secretary ṭang lai Mamon Majumdar chu Board of Control for Cricket in India (BCCI) roreltu sang ber Apex Council member atana thlan tlin a nih avangin CAM-a a post chelh lai a chelh chhunzawm thei lo, hei vang hian hun laklawhah inthlan a ni.

Tualchhung cricket rorelna sang hian season thar atan committee hrang hrang 11 siamin, hengah hian committee member 51 lai an ruat bawk.