Asian Games : Kan chau êm a ni - Chungnunga

Asian Games-a an match hmasa berah India-in 5-1 ngawtin China an ngam lo a, an mualpho. Mizo defender Lalchungnunga chuan, "Practice-na hun kan neih loh kan tuar a ni. Player-ten zing dar 3:00-ah hotel an thleng ve chauh a, kei phei chu flight chhuah hun sawn avangin chawhma dar 11:00-ah hotel ka lut ve chauh.

"Tlaiah match kan nei lehnghal a, kan chau lutuk a, kan tan tih ngaihna a awm lo," tiin Vanglaini a hrilh a, vawiin chawhnu dar 1:30-ah Bangladesh nen an inkhel lehnghal ang - East Bengal defender Chungnunga chuan beisei tur a awm thu a sawi.

Durtlang tlangval chuan, "Practice miah loa kan vawi khat khelh honaah China kan hmachhawn a, a lehpekah chuan a danglam tawh ang," tiin Vanglaini a hrilh.

Hangzhou, China-a neih Asian Games football-ah hian ram 23 an inel a, heng ramte hi group parukah ṭhen hran an ni - group pangaah team pali zel awmin, group pakhatah team pathum an awm thung.

Group tina a sang pahnih chu round of 16 lut chiang tur an ni a, pathumna zinga a tiṭha zual paliin an lut bawk ang. China lakah India tlawm nghal mah se, Bangladesh leh Myanmar an hmachhawn tel dawn avangin beisei tur a la awm.