ISL 2023-24: Mizoram player 27-in inelna an hmachhawn dawn

India rama football league ngaihven hlawh ber leh sang ber Indian Super League 2023-24 season chu zanin hian khelh ṭan a ni leh dawn ta a, Mizoram aṭangin player 27 ngawtin inelna an hmachhawn dawn.

ISL club zinga Mizoram player kawl hnem ber chu Odisha FC an ni a, Mizo player pakua ngawt an kawl - ISL club 12 zingah Chennaiyin chu Mizoram player tel lo pawha kal theia inngai awmchhun an ni a, South Indian club hian Mizoram player kawl an nei lo.

Bengaluru, FC Goa, Kerala Blasters leh Mohun Bagan ten Mizoram player pakhat ṭheuh an kawl a, a bak club dang zawngin player pahnih aia tam ṭheuh an kawl thung.

ISL match hmasa ber hi zanin dar 8:00-ah khelh tur niin, Kerala Blasters-in Bengaluru an mikhual dawn a, March 2024-ah season zo hman turin fixture duan a ni - thla sarih chhung ISL hi khelh a ni dawn, tihna a ni.

Kum 2014 khan ISL hi khelh ṭan a ni a, season hmasa berah hian Mizoram player paruk inlan vein Chennaiyin tan Jeje Lalpekhlua, Delhi Dynamos-ah S. Malsawmtluanga & Robert Lalthlamuana, Mumbai City-ah Lalrindika Ralte & Lalrinfela, NorthEast United-ah Zodingliana Tochhawng te an ni.

ISL season hmasa bera inlan zingah Adinga hi professional football la khel awmchhun a ni a, I League club Mohammedan SC-ah captain a ni mek. Kum 2020 thleng khan kum tinin ISL-a Mizo inlan zat hi an pung reng - 2015-ah 10, 2016-ah 14, 2017-ah 16, 2018-ah 20, 2019-ah 16, 2020-ah 30 a ni a, kum 2020 hi season khata ISL-a Mizo inlan an tam ber ṭum a ni.

Kum 2021 khan ISL-a Mizo inlan hi 27-ah tlahniam lehin, 2022-ah 26-ah a tla thla leh - tun season-ah player pakhatin Mizoram player an pung leh ta a, kum 2020-a player 30 inlan zat la phak lo deuh mah se hmasawnna chu a ni tho.

Hriat tel atana ṭha chu ISL-ah hian reserve team-ah Mizoram player an la awm nual a, heng ho hi club-in ṭul a tih dan a zirin squad-ah an la ziak lut leh thei.

––––––––––––––––––––––

Zanin Inkhel Tur

Kerala Blasters 8:00 PM Bengaluru FC

––––––––––––––––––––––