Tlai ni nemah Aizawl FC Vs Chanmari FC
Chawnpui hmaah Police fiahna
Tualchhung football-a team ṭha ber tehna chu Mizoram Police tih a ni ṭhin. Tunah erawh football kalhmang thlak a ni tawh a, Police hi tehfung atan hman a rem ta bik lo. Zote Toyota MPL10-ah meuh chaun Police pawh fiah an ngai ta.
Vawiin chhun dar 12:00 hian Mizoram Police leh champion lai Chawnpui FC te an inkhel dawn a, team ṭha pahnih inkhel hi en châkawm chhan ṭhahnem tak a awm. Lalrindika Hmar kaihhruai Chawnpui hi hmahruai mektu an ni a, Police pawh hi palina chinah awmin 'pressure' an nei ṭan. Police hliam tuar hi hmuh an châkawm ṭhin a, Chawnpui lakah tun hma an zia kha chhuah an tum dawn a ni.
BS-a a inringtawk
Police hi an chak lo a nih chuan palina chhuahsan thei an ni a, hetichung hian coach Lalbiaksanga Colney erawh a la inringtawk hle. MPL6-ah khan Police hian phase 1 (round 7 chin) ah point khat chauh an hmu a, phase 2 aṭangin BS-a Colney hian rawn enkawl ṭanin semifinal a thlenpui.
BS-a Colney chuan, "MPL6-a point khat chauh hmu Police kha, semifinal kan thlenpui. Tuna kan dinhmun hi thlir ila point riat kan hmu tawh. Phase 1 bikah Chawnpui chhiar telin match hnih khelh tur a la awm bawk. Semifinal hi kan thleng leh ngei dawn," tiin a inringtawk hle.
Police hian match hnuhnung berah Chanmari FC laka 2-0 a an hnufual hnuin an tho chhuak a, 2-2 in an inhnehtawk. 1st Bn MAP Ground-a second half-a an khelh dan kha Kolasib-ah chhunzawm an tum ang. Police hian captain Lalfakzuala an hruai thei dawn lo a, player dang erawh an kim. Striker Malsawmfela, midfielder R. Malsawmtluanga, winger Lalbiakhlua (Biaktea) leh keeper F. Lalmuanawma te hi Mizoram team-a a laimu pawimawh an ni ṭhin. Player chhuak thar F. Lallawmkima leh Lalrothlanga te hi hming chher chho tur an ni a, chhinchhiah a sual lo ang.
AFC hnehtu
Chawnpui FC hian match hnuhnung berah Aizawl FC an hneh a, inkhel hun tam zawk an thunun bawk. Coach Lalrindika Hmar hian a naute a hrechiang a, game plan fel tak a nei ṭhin. Police lakah pawh defending game khel mai loin attacking game a khel tel ang.
MPL champion lai Chawnpui hian captain Lalruatfela (RF-a) damlohna vangin an hruai tel lo a, player dang zawk an inpeih. Player hmuhnawm Vanlalthanga hi ven tham a tling a, Tea Chinzah pawh AFC tlarhnung tan a hnawksak. Chutihrualin Chawnpui bikah chuan mimal aiin team anga an thawhhona hi an ṭhatna lai a ni.
Chawnpui tlarhnungin Sawmfela an ven dah tur hriat a châkawm ang chiahin Police-in David Lalchhuanawma an ven dan tur hriat a châkawm. MPL champion lai hian tlarhmaah duh thlan tur player an nei tih hriat a ṭha a, Aizawl FC an hmachhawn ṭum pawhin K. Lalrosanga chu hun chanve hnu lamah chauh an luhtir - Police hneh thei turin an ṭha tawk.
Tlai ni nemah Aizawl FC Vs Chanmari FC
Aizawla Zote MPL10 en ziah ṭhin tan chuan Kolasib-in I League club Aizawl FC leh Chanmari FC inkhel tur an chang hi a thikawm hial ang. Chutihrualin MFA leh Zonet buatsaih Zote Toyota MPL10 hi Zonet Zawlbuk leh Empai kaltlangin a en theih.
Vawiin tlai dar 3:00 hian player ṭha rual awm khawmna Aizawl FC leh sum seng tam Chanmari FC te Kolasib Sports Stadium, Project Vengah an inkhel dawn. Covid-19 hnuah tualchhung club ṭha pahnih AFC leh Chanmari ten nomawi an la chawi leh lo a, kuminah nomawi duhin an tui hal ve ve. Inkhel hmuhnawm bik a ni dawn.
Inbuatsaihna ṭha
Chanmari FC-in Police lakah point khat chauh an hlawh chhuak a, an lawm lo. Niminah an khingpui tur Aizawl FC-in Kolasib an pan chauh laiin Chanmari erawhin September 18, Thawhṭanni khan inelna khelhna hmun tur hi an pan der tawh. Match khelhna tur hmun Kolasib Sports Stadium leh Saidan-ah training ṭha an nei tawh a, I League club hneh tumin an inbuatsaihna a ṭha hle.
CFC coach K. Malsawmkima chuan, "I Day Football-ah kan hneh lo a, tunah erawh team ṭha Aizawl FC hneh turin kan inbuatsaihna a ṭha. Player pawh kan nei ṭha a, Kolasib-ah hian hnehna kan chan ngei theih hi kan ring tlat a ni," tiin Vanglaini a hrilh. Chanmari hian I League thlenga sulhnu nei ṭha Lalkhawpuimawia (Mapuia), R. Laldanmawia leh Zothanmawia (T. Mawia) te an kawl a, captain Lalrinchhana Tochhawng an nei leh tawh bawk.
Tawnhriat nei player thlawp turin Laltlanzova, Lalruatmawia, Crespo Vanlalhriatpuia, Lalthangliana (AB-a) leh Thanglalven Gangte te an nei a, an player neih hi club neitu lamin champion pui theihna turah an ngai. Eng ang chiaha ṭha nge an ni tih chu I League club Aizawl FC lakah a fiah theih ang.
AFC an ṭha
Aizawl FC hi table-ah pathumnaah an awm chauh mah se player an nei ṭha tih erawh tualchhung football hrechiang chuan an pawm tlang ang. Kolasib-ah hian damlohna vangin Lalramsanga leh Lalbiakdika te an zin ve lo a, season liam ta captain Lalchhawnkima pawh la kir leh tawh mah se an hruai tel lo bawk.
I League club coach Victor Lalbiakmawia chuan, "Chanmari FC hian inbuatsaihna an nei ṭha tih kan hria. Chutihrualin I Day Football-ah kan hneh tawh a, hneh nawn leh ngei kan tum. Player-te pawhin Chanmari FC hmachhawn hi an châk a ni," tiin Vanglaini a hrilh.
Aizawl FC hian tlarhmaa Lalrinzuala an kawl a, midfielder hmuhnawm K. Lalrinfela'n Serchhip tlangval Rinzuala a thlawp hi hmuhnawm a tling. Chanmari lamin Zozoa an nei a, Aizawl FC lamin Zozoa u R. Ramdinthara (Tharpuia) an kawl a, Tharpuia te unau hi goal hmaah an hmuhnawm. Team pahnih hi Mizo player ṭha rual awmna ve ve a nih avangin game ṭha tak a beiei theih ang.
Kolasib an inpeih
Kolasib chu tun hma aṭangin football tuipui ṭhin kha kan ni a, Mizo club ṭha inkhel hi kan hlut viau ka ring. MPL round 6 pawh hi DFA-in MFA hnena kan dil kha a ni a, min tihhlawhtlinsak a, kan lawm hle.
Inelna thleng turin kan inpeih tawh a, club thlenna nei lote kan buaipuisak bawk. DFA Cup kan buatsaih khan entu an ṭha a, MPL-ah pawh an ṭha ang. Tun hi Kolasib-in football kan tui tih lantirna hun ṭha a ni.
- Lalthlana Ngente
Fin Secy, Kolasib DFA