Club thar DSK Shivajians inlan dawn
I League 2015-16 season-ah club thar pahnih an awm a, Aizawl FC-in match hmasa berah Mohun Bagan an hneh lo. Club thar pakhat zawk DSK Shivajians-in Pathianni tlai dar 4:30 hian Sporting Goa an tlawh dawn a, Ten Action-ah live a ni ang.
DSK Shivajians-ah Mizo defender pahnih Zohmingliana Ralte leh Lalhmangaihsanga Ralte (Sena) te an awm a, Spor-ting Goa hmachhawn tur hian Northeast United leh Chennaiyin FC defender-te hi an khelh ngei a rinawm. Club thar DSK-ah hian goalkeeper Subrata Paul leh forward Mohammed Rafi te chu hming langsar an ni.
Pune FC defender hlui Zotea chuan, "Kan match hmasa bera kan team nihna dik tak a lang. Sena nen hian hmun pawimawh kan chan ngei ka ring," tiin a sawi. DSK hi coach tawnhriat ngah Derrick Pereira enkawl tur a ni.
Squad-ah Jeje
Mohun Bagan-in vawiin tlai dar 4:30 hian Salgaocar an mikhual dawn a, Ningani tlaia contract ziak Jeje Lalpekhlua chu Goan club hmachhawn tur squad-ah telh nghal a ni. I League champion lai inkhel tur hi Ten Action-ah live a pek chhuah a ni ang.
India striker Jeje chuan, "Training vawi khat chiah ka la chhim a, Salgaocar nena kan inkhelh hun turah hian squad-ah min dah nghal mah se ka la inlan ka beisei lo. Tun season-ah kan squad a chhah ṭha em em a, player 18 awmna matchday squad-a tel ringawt pawh a harsa dawn khawp mai," tiin Vanglaini palai a hrilh.
Jeje bakah hian chief coach Sanjoy Sen hman turin Aizawl FC an hneh ṭuma awm lo Brazilian defender Luciano Sabrosa leh Bengali midfielder Pronay Halder te hman theih turin an awm tawh a, champion-na kawnga langsar ber Sony Norde erawh a la tel thei dawn lo.
Salgaocar-in an match hmasa berah Bengaluru an hneh lo a, team chhia erawh an ni lo. Goan club hi keeper ṭha Karanjit Singh, midfielder ṭha Rocus Lamare leh Scottish duo Martin Scott leh Darryl Duffy te awmna a ni.
East Bengal pawhin Sporting Goa an hneh hnuah Goa
aṭangin Mumbai an tlang nghal a, Pathianni zanah Mumbai FC an hmachhawn dawn. East Bengal vice captain Robert Lalthlamuana chuan, "Nikum khan Mumbai FC hi an mualah kan lo hneh tawh lo a, tun ṭumah erawh point thum kan hlawhchhuah ngei a ṭul dawn a ni," tiin a sawi.
Kolkata club tan Robert leh S. Malsawmtluanga te'n match hnuhnung berah inkhel bul an ṭan a, Nigerian forward Ranti Martins goal hnih chu Goan club laka point thum an hmuh theihna chhan a ni.