A chung berah Djokovic leh Osaka

United States Tennis Asso­ciation chuan Nilaini zan khan US Open atana player seeded ho a ti chhuak a, mipa leh hmeichhe player 32 ve ve ten singles huangah seed an chang - inelna hi August 26, Thawh-

ṭanni aṭanga khelh ṭan tur a ni.

A chungah Novak

Mipa leh hmeichhe lamah champion lai Novak Djokovic leh Naomi Osaka te chu a chung berah an awm. Serbian tlangval hian Wimbledon title panga la chungin inelna a hmachhawn dawn a, a hnung chiahah 2017 champion Rafael Nadal a awm - final hma chuan an inhmachhawn dawn lo.

Roger Federer-a'n Grand Slam nomawi 21-na beisei nan seeded pathumna nichungin bul a ṭan dawn, Swiss star hi world ranking-a a dinhmun angah chiah seed pek a ni; Wimbledon-ah kha chuan world number 3 nichungin seeded pahnihna pek a lo ni tawh.

Austrian tlangval Dominic Thiem, Daniil Medvedev leh Alexander Zverev te an intlar thla bawk a, New York-a champion tawh Marin Cilic (22) leh Stan Wawrinka (23) te pawh tun hnaiah khel ṭha tawk lo mah se seeded chang phak zingah an tel. 

Pakhatna Osaka

Season hmasa khan Naomi Osaka-i'n final-ah Serena Williams barakhaihin nomawi a chawi, Japanese nula zinga Grand Slam la thei hmasa ber hian kuminah Australian Open title a la leh tawh bawk. Mahse a hnu lamah erawh a hlawhtling zui thei rih lo.

Osaka hi champion lai a nih bakah world number 1 nilai a ni a, seeded pakhatna pek a ni hi a nih dan tur dik tak a ni. French Open champion Ashleigh Barty chu pahnihnaah a awm, Karolina Pliskova leh Wimbledon champion Simona Halep ten an hnung an zui bawk.

Grand Slam nomawi 24-na beiseitu Serena chu seeded pariatna pek a ni a, American nula hian major tournament-ah final a khelh hnuhnung pathumah hlawhtlinna a chang lo vek, an ramah hlawhtlin a tum ang. Tualchhung player beiseiawm Sloane Stephens chu 11-naah dah a ni thung.

Djokovic a zam lo

Nikum final-ah Djokovic hian Juan Martin del Potro hnehin nomawi a chawi, Arthur Ashe Stadium-ah fans lamin an ṭan em em Del Potro auh phur nan, "Ole, ole, ole, ole, Del-po, Del-po!" tiin an au nasa hle.

Wimbledon final an khelh 

ṭum pawhin Centre Court-a fans pungkhawm chu 'Roger, Roger, Roger' tiin an au rual nasa hle. Final boruak sang a khelh hnuhnung pahnihah Serbian tlangval hi ṭan hlawh lo zawk a ni zel a, mahse a zam phah chuang lo - nomawi a chawi ve ve.

World number 1 Djokovic chuan, "Roger tia au rual zingah khan Novak tih ri ka hre thei a, tun ṭumah pawh hian eng boruak pawh tawng ila ka buai phah lo ang. Kei chuan tennis hmuhnawm leh ropui chhawp chhuah hi ka tum ber a ni," tiin a sawi.



Share this Post

Login to comment
No Comments