Pakistan-a anti-polio center bulah bomb puak
Pakistan rama Balochistan province khawpui, Quetta-a polio vaccination center bulah nimin khan bomb a puak a, mi 14 an thi a, mi 20 in hliam an tuar.
Bomb puak vanga hliam tuarte hi Civil Hospital panpui nghal an ni a, an zinga ṭhen≠khat chu an din≠hmun a ṭha lo hle.
Bomb puah hnu hian emergency puan nghal a ni.
Polio vaccination center-a program hman mekah hian venhim hna thawktu eng emaw zat dah an ni a, nimin khan an program tawp ni tur a ni.
Thi zinga a tam zawk hi security force an ni.
Thawhṭanni
aṭang khan Balochistan province-ah hian anti-polio campaign hi kalpui chhunzawm leh a ni a, Quetta khawpui bakah province chhunga district hrang hrangah program buatsaih a ni.
Pakistan hi World Health Organisation (WHO) list-ah zeng natna thlen tamna ram zingah telh a ni a, nikum chhung khan polio vei thar mi 49 report a ni.
Kum 2014 khan mi 282 in an vei thar bawk. A bikin Pakistan hmarthlang lam, tribal bial bikah zeng natna hi a la tam hle.
Tunhma lam pawhin ram chhunga polio vaccination team-te hi sakhaw firfiak pawl, Tehreek-e-Taliban Pakistan leh an thurualpui pawl dangte chuan an lo vau tawh ṭhin a ni.