Syrian naupangte lehkha zirtirna atan USD mtd 250 pe

Syria rama naupang, tualchhung indona avanga lehkha zir mumal thei lote hnenah lehkha zirtirna turin donor-te chuan United Nations hnenah US dollar maktaduai 250 an pe.

Hetihlai hian hian Turkey, Lebanon leh Jordan-a naupangte lehkha zirtirna atan dollar maktaduai 500 dang mamawh a la nih thu UN chuan a sawi nghal bawk.

UN envoy for global education, Britain Prime Minister hlui, Gordon Brown chuan Syria mipui raltlan zinga naupang maktaduai hnih leh, an ramchhung hmun hrang hranga himna zawnga tlanchhia mi maktaduai telte chuan lehkha an zir chhunzawm thei lo tiin a sawi.

Girls Not Brides organization chuan Syria raltlan zingah kum tlingloa innei, child marriage chu 12% aṭangin 26% a pung chho tih a sawi a, hei bakah hian raltlan mipa naupang leh hmeichhe naupang tam tak chu kum tlingloa hnathawka chhawr an ni bawk.

Gordon Brown chuan, "Syrian naupangte tana lehkha zirna remchang siamsak hi thil hmanhmawh thlak tak a ni a, hei hian naupangte hmalam hun atan beiseina a siam≠sak thei dawn a ni," tiin news conference a neihah a sawi.

Brown chuan Lebanon ramin school-ah double-shift class a siam chu hlawhtlinna ropui tak nia a ngaih thu a sawi a, hemi hmang hian Syrian naupang raltlan 200,000 chu lehkha an zirtir thei a ni, a ti.

Syrian naupangte hian Lebanon naupangte school an ban hnuah, tlai leh zan lamah lehkha an zir ve ṭhin a ni.

Turkey ramah Syrian raltlan naupang 200,000 chuan school-ah lehkha an zir mek a, hei hi kuminah chuan 400,00 ah tihpun tum a nih thu leh, Jordan ramah pawh naupang lehkha zirtir mek 130,000 chu 200,000 ah tihpun tum a ni, a ti.

"Nakkumah chuan Lebanon, Jordan leh Turkey-a Syrian ral≠tlan naupang zawng zawngte chu school kaltir theih beisei a ni," a ti.