Champions League khel tur zawnna playoff first leg chu Thawhlehni leh Nilaini zan khan khelh a ni a, nikum semifinalist Ajax chu group stage thleng pha lo thei dinhmunah an ding.

GSP Stadium, Cyprus-ah Ajax leh mualneitu APOEL Nicosia te 0-0 in an inhnehtawk a, Ajax right back Noussair Mazraoui chu minute 80-naah an hnawt chhuak. Second leg hi August 28, Nilaini zan hian Amsterdam Arena-ah an khel dawn a, goal awma an inhnehtawk a nih chuan APOEL zawk hi group stage lut tur an ni.

A goal lo

Ajax hian season liam taa an player pawimawh zingah Frenkie de Jong (FC Barcelona) leh Matthijs de Ligt (Juventus) te chhawr thei tawh lo mah se an starting eleven erawh an la ngai hle.

Tlarhmaah Dusan Tadic leh David Neres te an awm a, Daley Blind-a'n tlarhnung a ho. Amaherawhchu Cyprus-ah Ajax hian 72% zet ball possession an nei chungin goal an khung thei lo a, defender Mazraoui hnawhchhuah a nih avangin a tawp minute 10 chhung player 10-in an khel thung.

UEFA hnuai inelnaah hian away goal rule hman a nih avangin Ajax-in group stage thlen an duh a nih chuan Amsterdam Arena-ah goal an khung ngei a ṭul tawh ang.

Inkhel dang

Olympiakos Piraeus-in a mualah Krasnodar 4-0 a an hneh avangin hmabak a awlsam a, Slavia Prague leh Club Brugge pawhin khualmualah CFR Cluj leh LASK 1-0 ve vea an hneh avangin an dinhmun a ṭha bawk.

Dinamo Zagreb pawhin an mualah Rosenborg 2-0 in an hneh a, an hmabak a êng. Young Boys leh Red Star Belgrade te 2-2 in an inhnehtawk a, tling tur hriatthiam a la har hle.

Share this Post