Central team-in Malda buaina chhui dawn

West Bengal-a Malda district-a tharum thawhna thleng chungchang chu sorkar laipui chuan central team chhuitir a tum.

West Bengal-a eptu party-te chuan buaina hi chi leh chi inkara chhuak niin an sawi a, mahse Trinamool Congress hotu, Chief Minister Mamata Banerjee-i kaihhruai sorkar chuan thu dik lo tiin a sawi thung.

Mamata chuan he buaina hi tualchhung mite leh Border Security Force-te inkara thleng a ni, a ti.

Malda buaina a hmuna enfiah tuma kal, BJP team pawh state police-te'n lo dangin, Kolkata-ah an kir tir leh a ni. Hemi hnu hian BJP palaite chuan Union Home Minister Rajnath Singh hmuin, buaina thlen dan hi high-level team chhui tir turin an phut.

BJP hruaitute chuan Malda buaina thlengah hian Trinamool Congress leh Janata Dal (United) worker-te chu inhnamhnawihah an puh a, JD(U) Rajya Sabha MP Ghulam Rasool chu mipuite fuihpawrh bertu tiin an sawi.

Rasool hi Muslim pawl, Idra-e-Shari nena inzawmna neia puh a ni a, he pawl hian Hindu right-wing hruaitu pakhatin Uttar Pradesh-ah Prophet Mohammad chungchang mawi lo taka a sawi avangin kawngzawh an huaihawt a, kawngzawh aṭang hian buaina a chhuak zui ta a ni.