Moise Kean: Everton-in engtin nge an hmin?

Kum 19 mi lek a ni a, Italy tan vawi thum inlanah goal hnih a khung tawh. Chu mai a ni lo, khawvela club ṭha ber pawl Juventus tan a khel a, Cristiano Ronaldo te nena dressing room khat hman ho ringawt pawh rawlthar footballer tam tak mangphan a ni. 

Mahse, chu zawng zawng tlansan chuan Moise Kean-a'n a la dai ngai loh England a pan a, Europe mai ni lo, Premier League-a club ṭha pawl pawh ni phak lo Everton a pan. 

Italian striker hian engvanga Everton pan ngawt nge a nih? Mi tam takin Kean-a thutlukna an hrethiam lo a, Italy lamah chuan Juventus fan-ten an club hruaitute an dem. 

A sakhming Brand

Everton-in Kean an lakluh theih nana mi pawimawh tak chu club director of football Marcel Brands a ni a, Dutch football administrator hi PSV-a a hnawthawh avangin fak a lo hlawh tawh hle. 

Hetihrual hian Brands hi a vannei tel ve bawk tih hriat a ṭha. Kean-a chher liantu Massimiliano Allegri chuan Juventus a chhuahsan a, coach thar Maurizio Sarri a rawn lut. 

Sarri-a'n Juve a pan rualin mimal taka a striker ngainat Gonzalo Higuain chu AC Milan leh Chelsea-a loan-a hun a hman hnuin Juve-ah a lo kir ve chiah bawk a, Kean hma hun a thim. 

Juventus hian Cristiano Ronaldo thawhpui turin Paulo Dybala, Mario Mandzukic leh Douglas Costa-te chu an neihsa langsar an ni a, Kean tan hmasawn zel tur chuan chhuah ngei a ngai. 

Chu pawh ni se...

Ni e, "Chu pawh ni se..." tiin Kean-a'n Everton kher a thlan chhan hi hriat a la châkawm cheu - a bik takin Inter Milan, Arsenal leh Manchester United-in lakluh an duh ve tho a ni, tih hriat tel ngat phei chuan!

Hetah tak hian Brand-a pawimawhna a lo lang chhuak. Dutch journalist lar Joep Schreuder chuan, "Brand-a'n Kean a hmin dan hi chu a thiam dan sa a ni. Brand chuan chhungkua hi a dah pawimawh hmasa ber zel a, chumi tur chuan an chhungte a lo hmin hmasa zel. 

"Tunlai khawvela sum pawimawhzia a hai bik lo. Mahse, chu ai chuan thinlung a pawimawh ber tih a hria a, player-te nen thui tak an indawr hmain an chhungkua, nupui, nu leh pa te a be vek a, an chhungkaw chanchin a hre em em zel - engkim a hre vek zel tak tak," a ti a, Kean-ah pawh Brand hi hetiang chiah hian a che. 

Media hmaa Kean an phochhuah pawh khan Brand hian Kean-a nu hnenah a hming chuanna jersey a pe a, "I fapa hi duat takin kan lo enkawl ang," tiin a hrilh zui a, nu tan chuan thlamuanna tham a ni. 

Brand leh a hnathawh

Everton-in Kean an lakluh theih chhanah club chairman Bill Kenwright hming lam hmaih a thiang bik lo. Kean-a agent Mino Raiola chu Brand nena an ṭhian hnai tak a ni a, Italian striker an lakluh theih nan he inṭhian ṭhatna hi a ṭangkai hle. 

Chutihrual chuan Brand bawk hi fak ngai leh ṭhin chu a ni - a sulhnu a ropui tlat! Everton a pan hma pawh hian Dutch club RKC Waalwijk, AZ Alkmaar leh PSV Eindhoven-ah te director of football hna a lo thawk vek tawh a, a hlawhtling vek. 

PSV-a hna a thawh laiin Georginio Wijnaldum chu Feyenoord aṭangin a thlem chhuak a, Willem II aṭanga AZ Alkmaar tana khel tura Mousa Dembele -a thlem chhuahte khan pawisa a ngah bik lo!

Dutch journalist Schreuder chuan, "Football khawvel a hriat dan hi a awihawm loh zawk a ni. Thil thleng dan a zirin a insiamrem thei a, AZ leh PSV-ah khan pawisa nei tam lo chungin transfer ṭha tak tak a thlentir a ni," tiin Brand a fak. 

Lozano mawlh kha

Brand chanchin an sawi apianga an sawi lan ṭhin chu Mexican player ṭhangduang  Hirving Lozano thlem chhuak tura a hnathawh kha a ni. 

Thla ruk zet chu Lozano hi a rim a, Lozano leh a chhungte chu vawi hnih ngawt a va zin chilh bawk - kum 2017-ah Pachuca aṭangin a lalut ta nge nge a, a season hmasa berah league goal 17 khungin assist vawi riat a nei hman. 

Tun nipui transfer-a Manchester City aṭanga Fabian Delph lalut turin English midfielder hi a inah a va lenchilh hmiah bawk!

Schreuder chuan, "Kean-a lalut hian Brand dinhmun dik tak a sawi a, hetianga transfer ṭha a neih tawpna tur pawh a ni lo ang," tiin a fak zui. 

Tu nge Kean chu?

Brand hnathawh ropuizia kan sawi a, hetiang taka fak a nih chhan Kean hi eng ang chiaha ṭha nge a nih, tih chu zawhna a ni. Juventus academy aṭanga inzir chhuak striker hian season hmasa khan Juve tan match 17 khelin goal sarih a khungsak. 

Kum naupang a la nih avangin sulhnu chhuan tur a la nei lo. Mahse, hmabak êng tak nei a nihna erawhin sawi a hlawh hle - tharum a ngah a, a nghet a, a che rang a, a finishing a tawih hle bawk. 

Centre striker anga khelh chu a nuam tih ber ni mah se second striker leh left winger ang pawha chhawr theih a ni - Juve-a a pholan a theihna kha a puitlin thei a nih chuan Premier League striker 'hot' ber pawl a ni chho thei ang. 

Kean hian Premier League match hnih a khelh tawhah goal erawh a la khung lo a, zanin dar 12:30-a Aston Villa nen league match an khelh turah fan-ten a goal khung lai hmuh ngei an duh dawn. 



Share this Post

Login to comment
No Comments