Manipur-a All Naga Students' Association (ANSAM) chuan Manipur Public Service Commission (MPSC) chairman hnenah Chandel, Senapati, Tamenglong leh Ukhrul hill district headquarters-a exam centre siam an phutna memorandum an theh lut.

ANSAM chuan memorandum-ah hian an thil phut hi Manipur hill district-a Naga ṭhalai leh zirlaite tan awlsamna leh remchang zawnna ni loin, rorelna dik, intluktlanna, constitutional rights leh mihring dikna chanvo humhimna atan zawl a ni tih an tarlang. Zirlai pawl chuan zirlai exam hmachhawn turte chuan hmun hla tak tak an pan a ngai ṭhin a, sum lamah harsatna an tawk nasa tih an sawi. Harsatna hrang hrang an tawh ṭhin chuan exam inpuahchahna leh an hmachhawnnaah an hnufual phah tih an sawi bawk.

Manipur hill district-a zirlaite chu hun rei tak chhung exam hmachhawn tur hian Imphal emaw a aia hla zawk, Guwahati emaw an pan a ngai ṭhin tih memorandum-ah chuan an tarlang. Hmun hla zawk pan a ngai ṭhin chu candidate-teah harsatna a thlen a, hei bakah hill district-a exam centre awm loh avangin mi hnuaihnung leh rethei zawk, sum lamah harsatna neite chu an taksa hriselna leh rilru thlengin a nghawng tih an tarlang.

Commission chu hill district hmun khatah tal exam centre din turin an ngen a, harsatna tawk loin zirlaiten exam an hmachhawn ve thei dawn a ni, an ti. Memorandum-ah hian India ram dan pawh tarlangin, Article 14-ah intluktlanna leh, Article 21A-ah zirna lamah dikna chanvo an tarlang bawk. Hill district-a exam centre siam a nih loh vang hian commission chuan constitutional provision pahnih a bawhchhia tih an sawi bawk.