Meghalaya-a National People's Party (NPP) kaihhruai ṭangrual sorkar leh, Nagaland-a National Democratic Progressive Party (NDPP) leh Bharatiya Janata Party (BJP) ṭangrual sorkar thara minister-te ruat fel an ni tawh a, state pahnihah hian hausa tawntaw, crorepati rualten ro an rel dawn a ni.

Meghalaya leh Nagaland-ah hian CM-te telin minister 12 ve ve an awm a, minister-te chanpual tur pawh sem fel an ni tawh bawk.

Meghalaya minister-te crorepati hlang

Meghalaya chief minister, Conrad K Sangma kaihhruai Meghalaya Democratic Alliance (MDA) sorkar term hnihnaa minister 12-te chu an vaiin hausa tawntaw, crorepati vek an ni.

Meghalaya Election Watch leh Association for Democratic Reforms chuan CM Sangma telin, minister 12-te affidavit thehlutte an zirchianna report hi an tichhuak a ni.

Minister zingah Nartiang (ST) bialtu MLA, Sniawbhalang Dhar chu hausa berin, Rs vbc 45.35 hu a nei a, a rethei ber chu Rongara Siju (ST) bialtu MLA Rakkam A. Sangma niin , a thil neih hlut zawng hi Rs vbc 1.71 hu a ni bawk. Minister 12-te thil neih hlut zawng hi chawhrualin Rs 11.45 hu a ni.

Criminal case nei lai minister pakhat awmin, serious criminal case nei pakhat a awm bawk.

Minister panga te chu zirna lamah Class 10-12 inkar niin, paruk chu graduate leh a chunglam an ni a, diploma holder pakhat a awm.

Minister 6-te chu kum 25-50 inkar a ni a, a bak 6 dang chu kum 51-60 an ni. Cabinet minister zingah hian hmeichhia pakhat a awm bawk.

Chief minister Sangma chuan MDA 2.0 sorkar chuan spokesperson atan cabinet minister pathum - Ampareen Lyngdoh, Payl Lyngdoh leh Marcuise N. Marak-te a ruat tih a sawi.

Sangma chuan portfolio pawh semfel tawhin, CM hian Finance, Forest, Political, Personnel, IT, leh Mining and Geology department a chang ang. Deputy CM awmin, Prestone Tynsong chuan Home, PWD, District Council Affairs, leh Parliamentary Affairs department a chang dawn a, Sniawbhalang Dhar chuan Urban Affairs, Transport, Industries, leh Prison and Correctional Services a enkawl dang. Hmeichhe minister awmchhun M Ampareen Lyngdoh chuan Health and Family Welfare, Law, Information and Public Relations, leh Agriculture department-te a chang dawn a ni. .

Nagaland minister zingah crorepati 11 an awm

Nagaland chief minister, Neiphiu Rio kaihhruai unity sorkar thara cabinet minister 12 zingah 11 chu crorepati an ni. Minister-te hausakna hi chawhrualin mi pakhatin Rs vbc 10.58 hu nei ang an ni.

Nagaland Election Watch leh Association for Democratic Reforms chuan CM Rio telin, minister 12-te affidavit thehluh a zirchianna hi tichhuakin, CM Rio chu a hausa ber a, Rs vbc 46.95 hu a nei.

Minister zingah rethei ber chu Tizit (ST) bialtu, P.Paiwang Konyak niin, a thil neih hlut zawng hi Rs nuai 67.84 a ni.

Minister 12 zingah hian hmeichhia pakhat a awm a, Nagaland-in hmeichhe minister a neih hmasak ber a ni bawk. Minister 8 chu zirna lamah Class 8 -12 inkar niin, 4 chu graduate an ni. Minister thar zingah hian thubuai nei lai an awm lo.

Chief Minister Rio chuan minister-te portfolio a sem fel tawh a, minister 12 bakah adviser 24 a ruat. Adviser atana ruatte hi NDPP MLA 17 leh BJP MLA 7 an ni. Adviser-te hi portfolio pawh pek an ni a, mahse hlawh hran a awm lo ang.

CM hian department pawimawh Finance leh P&AR bakah minister-te a pek loh dang zawng a chang ang.

Deputy chief minister pahnih awmin, NPF hotu TR Zeliang chuan planning and transformation bakah national highways department a chang a, BJP hruaitu Y Patton chuan home leh border affairs a chang bawk. March 7-a state cabinet meeting hmasa ber khan Planning and Coordination department tih chu Planning and transformation department tiin an thlak a ni.

Hmeichhe minister hmasa ber leh awmchhun, Salhoutuonuo Kruse chu women resource development leh horticulture chantir a ni.