Bodoland state hran ngiatna thar thawh leh dawn

Assam aṭanga Bodoland state hrang ngiatna chu pawl pathumte chuan thla thar 

aṭangin thar thawh leh an tum. 

All Bodo Students' Union (ABSU), National Democratic Front of Bodoland (Progressive) leh Poeple's Joint Action Committee for Bodoland Movement chuan September thla hian hma thar lak dan tur ngaihtuahin Delhi-ah National Federation for New States (NFNS) hmingin meeting pawimawh tak an nei dawn. Bodoland state hran ngiatna chu na zawka kalpui an tum a ni. 

ABSU president Promod Boro chuan sorkar laipuiin Jammu and Kashmir chu union territory pahnihah a ṭhendarh thei a nih chuan, Assam thendarh pawh a theih lohna tur a awm lo tih a sawi a, Bodo mipuite duhdan leh beiseinate tihlawhtlingin Bodoland state a siam ngei tur a ni, a ti. 

Boro chuan Bodo movement chu NFNS a lo din theihna chhan pakhat a ni tih sawiin, ramchhunga Bodoland state hran din thlawptu pawl zawng zawngte chu NFNS hnuaiah an awm vek tih a sawi. Bodo mipuite thil duh chu state hran pek an nih chauhin a tihhlawhtlin sak theih a ni tiin, hei hi Constitution Article 2 leh 3  hmangin a siam theih thu a sawi. 



Share this Post

Login to comment
No Comments