Guwahati-ah Rs vbc 200 sengin "Unity Mall" sa dawn

Assam sorkar-in Guwahati-ah "Unity Mall (Ekta Mall) sak a tum tih Assam tourism minister Jayanta Malla Baruah chuan a sawi. Mall sakna tur atan hian Rs vbc 226 ruahman a ni.

Guwahati khawpuia "Unity Mall" sak chuan rampum inpumkhatna a thlen bakah, "Make in India" rilru puthmang a tilar dawn tiin state sorkar chuan a sawi. Hei bakah hian, "Unity Mall" chuan 'One District One Product (ODOP)' a chawikang dawn bawk a ni," a ti.

Assam cabinet chuan Thawhlehnia chief minister Himanta Biswa Sarma hoa meeting an neihah, Mall sa tura thuthlukna hi an siam a ni.

"Unity Mall" hian district zawng zawng 35 tan showroom a nei dawn a, Betkuchi hmun Guwahati-a Assam Trade Promotion Organization Complex-ah sak a ni ang.

Tourist Minister sawi danin, "Unity Mall"-ah hian Assam leh hmarchhak state danga GI product-te zawrh a nih bakah, Assam siam chhuah thil "Made in Assam" chawikanna tur a ni. Hei bakah hian ODOP kalpuina tur hun remchang a siam dawn bakah, state chhunga district zawng zawnga industry tenaute leh kut themthiamte tan sumdawnna kawngah a pui dawn bawk a ni.