Champhai GNM School thar hawn a ni

Health & Family Welfare minister Dr R Lalthangliana chuan nimin khan Champhai Vengsangah General Nursing & Midwifery (GNM) School a hawng.

HFW Minister hian nimin vêk khan India Covid-19 Emergency Response and Health Systems Preparedness Package Phase II (ECRP-II) kaltlanga Rs 13,46,40,800 sênga siam tur Champhai District Hospital-a Critical Care Block lungphùm a phúm bawk.

Health Services joint director (Nursing) Lalchhanhimi sawi danin, Lunglei leh Kolasib-ah GNM School din a ni tawh a, Champhaia din leh tak chu pathumna a ni. Kumin academic session-ah zirna bul ṭan nghal tum a ni a, batch khatah seat 20 zel a awm ang. Principal tur sorkarin a ruat tawh a, zirtirtu (tutor) tur 20 lakna kalpui mek niin, MSSSB-in written exam a buatsaih tawh result nghah mek a ni.

Champhai District Hospital-a Critical Care Block chu ZMC Critical Care Block nen a ruala ruahman a ni a, damlo na zualte enkawlna tur niin, khum 50 dah tum a ni.

Dr R Lalthangliana chuan, Mizorama sub-centre awm zawng zawng 375 chu health & wellness centre-ah hlàn kai vek tawh a nih thu te, sub-centre awm lohna khaw 235-ah health clinic din tawh a nih thu te, SEDP aṭangin health worker 235 lak a nih tawh thute a sawi.

Champhai South bialtu MLA TJ Lalnuntluanga, minister of state leh Champhai North bialtu MLA Dr ZR Thiamsanga, HFW Board vice chairman-te pawhin thu an sawi a ni.