Zheng lakah Swiatek a chak

Iga Swiatek chuan Cincinnati Open quarter-final lut turin fiahna a paltlang. World number 1 hian a khingpui Zheng Qinwen lakah set hloh hmasa mah se, a hnuhnung pahnih lain last 16 a paltlang.

US Open champion lai Swiatek hian world number 24 Zheng hi 3-6, 6-1, 6-1 in a hneh. Quarterfinal-ah chuan Wimbledon champion Marketa Vondrousova nen an inhmachhawn ang, seeded 10-na Vondrousova hian inkhel dangah Sloane Stephens chu 7-5, 6-3 in a lo hneh thung a ni.

Polish nula Swiatek chuan, "Ka coach hian hmanni deuh khan, set khatnaah ka khel ṭha tawk lo a nih chuan set hloh mai a, a hnu lama theihtawp chhuah turin min hrilh.

"A tirah chuan ngaihdan ṭha lo tak niah ka ngai a, tunah erawh match ṭhenkhatah chuan ka tana ṭha zawk a ni tih ka hrethiam," a ti. Set khatnaah thli a thaw nasa a, 3-0 a hniamin set a hlo. Set hnuhnung pahnihah erawh game khat ve ve chauh hlohin a tlang.

Inkhel dangah Elena Rybakina a vanduai. World number 4 hian Jasmine Paolini lakah set khatna a la a, set hnihnaah 2-5 in a hniam mek, hliam vangin a inkhel chhunzawm thei ta lo a ni.

Seeded pariatna Maria Sakkari erawhin Karolina Muchova chu 3-6, 6-2, 6-3 in a hneh ve thung.