Pro Fight tel tum an tam

Tata SK 612 LPS Pro Fight-a tel tum mi 120 chuangin application form an la chhuak tawh a, KT Enterprise chuan kum kal ta ang bawkin boxer, referee leh judge tiṭhate lawmman a tumsak leh dawn.

Anupam Aluminium, Samsung leh Panasonic home appliances distributor KT Enterprise, Ramhlun North chuan best boxer, best challenger leh best promising boxer lawmman bakah PC Lalnunmawia Trophy for Best Referee leh Best Judge lawmman a tumsak leh dawn a ni.

Nikum khan boxer ṭha ber hnenah Panasonic Washing Machine kg 8 leh trophy hlanin, Best Challenger leh Promising Boxer-in Rs 8,000 leh trophy ve ve, referee leh judge tha berin trophy leh Rs 6,000 ve ve an dawng a, kuminah KT Enterprise chuan lawmman ṭha zawk pek am tum.

August 15, Thawhlehni aṭang khan boxer tan application form lak chhuah theih a ni a, September 20 thleng hun hawn a nih laiin ni thum chhungin mi 121-in an la chhuak tawh a, ningani tlai thlengin mi 48-in an theh lut.

October 2, Thawhṭanni khian LPS Arena, Falkland Veng, Aizawlah Tata SK 612 Pro Fight tan a ni dawn a, kum 17 chin chung lam a duh apiang tan weight hrang panga fly (kg 48-52), bantam (kg 52-56), light (kg 56-61), welter (kg 61-67), middle (kg 67-74)-ah a tel theih a, nikum khan weight hrang pangaah tho title inchuhin boxer 211 an tel a ni.