Hmeichhe World Cup final - Spain vs England
FIFA Women's World Cup final pawh a hmawr bawk a ni dawn ta - Pathianni tlai dar 3:30 hian la champion loh chu sawi loh, final pawh la lut ngai lo Spain leh England an intawng dawn a, hmeichhe football-a roreltu nih an inchuh dawn.
Team pahnih final zinkawng ringawt pawh hi ngaihnawm a tling - Spain hian semifinal-ah USA leh Netherlands pet chhuaktu Sweden pet chhuakin khawvel an barakhaih a, chenna ngai loh ram fang turin final an lut.
England thawnthu pawh ngaihnawm tak a ni - semifinal-ah inelna thlengtu leh boruak ngah tak, Australia an hmachhawn a, rilru zam hma chi tan chuan Australia jersey haa stadium khat tlata pungkhawm fans kha chak lohna tham a ni.
Mahse, English nulaten an rilru paukhauh tak pholangin, semifinal-ah 3-1 in Australia an hneh a, boruak leh haw haw hmanga vau zam chi an ni lo, tih an pholang - nimin lam chhuak English chanchinbute chuan an nulate chanchin lo chu ziah tur an hre meuh lo!
Thawnthu lungchhiatthlak
Nikum lawka team talbuai tak Spain-in final an luh chhoh dan chanchin hi a lungchhiattthlak zawnga sawi chuan a lungchhiatthlak a, chutihrual chuan chu harsatna zawng zawng hneha final an luh dan erawh thawnthu ngaihnawm a tling lawi si.
Nikum lawk khan Spanish player tam tak chu coach Jorge Vilda chungah an lungawi lo a, Spanish Football Federation (RFEF) chuan national player 15 lai chuan Vilda an ban a nih loh chuan, ram tana an inlan tawh loh tur thu an hrilh niin an sawi.
Kum 2015 khan Vilda hian Spain hmeichhe team hi a enkawl ṭan a, a game kaihhruai 70% vel zetah hnehna chanpui mah se, quarterfinal aia sang an thlen theih loh avangin duhkhawp lohna a sang - a training neihpui dan, game thlir dan leh a ruahmanna hrang hrangte chu sawisel a ni.
Mahse, Spain-in an ram coach lam an ṭang tlat a, player 15-te chuan ngaihdam an dil a nih loh chuan ram tan an inlan theih loh tur thu an lo hrilh let hlauh - an tel lo pawhin an kal theiah an ngai a, players ṭhenkhat chapona hmaah tlawm an tum lo.
Thawnthu ngaihnawm
Player 15 zinga pathum forward Mariona Caldentey, midfielder Aitana Bonmati leh defender Ona Batlle ten ngaihdam an dil a ni mai thei, Spain squad-ah koh let an ni a, tunah chuan Spain-in a la khelh ngai reng reng loh World Cup final an khel dawn ta - thawnthu ziaktu thiam takin a duh ang thala thawnthu a kuai her vel ang mai a ni.
Spain team-a kir leh tawh loh zingah Barcelona tana Champions League nomawi chawitu midfielder Patri Guijarro, defender Mapi Leon, forward Claudia Pina leh goalkeeper Sandra Panos te an tel a, mahse, anni titau lo se hmun chang lo tur player tan erawh an lawm lohna hi lawmna thlentu a ni lawi si.
La Roja boss Vilda chuan, "Ka sawi nawn leh duh chu, ka player-te hi ka ngaihlu êm êm vek tih hi a ni. Kan chunga thil thlengte hi kan tan chuan zirlai vek a ni a, chu chuan min tichak a ni," a ti.
Spain tan tun hi World Cup vawi thum an khelhna chauh a ni a, nomawi chawi ta lo pawh ni se hmeichhe football-a an sulhnu thlirin inchhuanna tham thawnthu an hnutchhiah tho - khawvelin a hre reng dawn.
Mahse...
An la thlen ngai loh final hial thleng mah se Spain lawm erawh a la kim lo a, vawi khat chiah chak leh a, nomawi nen ngeia haw an duh. Hei erawh a chiang ang - Spanish mipui zingah an champion duh lo tawk an awm ngei ang!
Vilda chuan, "Semifinal-a hnehna kan chan chiah kha chuan ka chhungte ka rilruah an lo lang a, kan chunga thil thleng zawng zawng ka thlirkir bawk. RFEF president Luis Rubiales leh Spanish football hotu zawng zawngte min thlawpna kha ropui ka ti a, ka hre reng ang.
"Ka chhungte min thlawpna pawh sawi hmaih theih a ni lo a, kha hun harsa tak avang khan hrehawm an ti êm êm ṭhin," a ti - nikum September khan Vilda hian, "Ka thil tawn ang hi tumahin an tawn ve ka duh lo. National team tana khelh duh player-te nen kan awm ho a ni," tiin a lo sawi tawh.
Vilda chuan sawi zawmin, "Tunah chuan thil duhawm lo zawng zawng kha theihnghilh a, hma hun thlir a hun ta - kan thlen chin hi kan phu reng a ni, tih kan hriat a ṭul bawk," a ti a, England lakah Spain chakpui ngei a tum.
England beiseina
Lionesses (England hmeichhe team sawina) in a vawi khat nan World Cup final an lut a, tun dinhmun an thlen theih chhanah chawimawi tur an awm a nih chuan coach Sarina Wiegman tluka chawimawi phu an awm chuang lo.
Wiegman chuan, "Final kan thleng mai hi a awihawm loh zawk hial a ni. Nomawi chawi ang hialah ka inchan a, kan la champion lo na a, he game-ah hian hnehna kan chang a ni," a ti a, an thlen chin chu a ropui thu a sawi.
Kum 53 mi Wiegman hian kum 2017 khan Netherlands chu Euro champion a nihpui a, kum 2019 khan World Cup final a hruai thleng bawk - England a enkawl hnuah Euro 2022 nomawi a chawipui a, World Cup final a hruai thleng leh ta!
September 2021-a England hmeichhe team enkawl ṭantu coach chuan, "Player emaw coach kan nihna ang pawhin ni se, final khelh hi thil ropui a ni a, final vawi li ka khel dawn ta. Thil thleng hi a tur ve rengah ka ngai hran lo a, ka tan chuan engkim hi thawnthu ang mai a ni," a ti.
A rem tawh lo
Wiegman-i'n Netherlands leh England tan Euro nomawi a chawi ve ve a, World Cup final a hruai thleng ve ve bawk - hei erawh nomawi a la chawi lo a, Netherlands nena an thawnthu ngaihnawm lo kha thlen nawntir loh hram a duh ang.
Kum 1966 khan England mipa team chuan World Cup nomawi an chawi a, hemi hnuah hian mipa a ni emaw, hmeichhia a ni emaw World Cup final an la khel leh ngai lo - tunah an khel dawn ta a, an coach Wiegman hi FA chief executive Mark Bullingham chuan Gareth Southgate-a'n England mipa team a enkawl zawhah a thlaktu tura an ngaihtuah thu a sawi hial!
Wiegman chuan, "Ka team-te ka chhuanzia hi thuin ka sawifiah thiam lo zawk. Engtiklai pawhin an insiamrem thei zel - tournament hma a ni emaw, tournament hnu emaw pawh ni se, an insiamrem thei zel a ni.
"Semifinal-ah hnehna kan chang a, kawng harsa tak paltlanga hnehna chan dan kan zawng hmu leh hram thei kha a ropui hle," a ti - Pathianniah chu thawnthu ngaihnawm chu ziah zawm tumin an bei dawn e.
