North Tripura-a Dharmanagar-ah Pathianni khan Communist Party of India-Marxist (CPI-M) leh Bharatiya Janata Party (BJP) inkarah buaina a chhuak a, hemi avang hian venhimna khauh taka kalpui zui nghal a ni.

Dharmanagar-ah hian BJP Yuva Morcha worker-te hian Pathianni chawhnu khan kawng an zawh a, an kawngzawh lai hi  CPI-M leader leh amah thlawptute chuan hriamhrei hmangin an lo bei niin an sawi. BJP lam hian lo bei let ve bawkin pawl pahnih inkarah hian buaina nasa tak a chhuak zui.

He buaina chhuakah hian bike 15 leh car chu hal chhiat a ni bawk.

BJP Yuva Morcha-te hian Panchayat inthlanna neih tur atan campaign an neih laiin buaina hi chhuak a, Dharmanagar-a an candidate ho in kawng hi an zawh laia chhuak nia sawi a ni.

Thulakna ṭhenkhat chuan BJP hian Pathianni khan CPI-M party office an bei a, bungrua pawh an tichhe nasa hle a, hemi avang hian CPI-M hian BJP kawngzawh hi an bei tih an tarlang ve thung.

Pathianni-a party pahnih inkara buaina chhuakah hian hliam eng emaw zat an awm a, mi pathum chu Silchar-ah enkawl zui tura thawn an ni bawk.

Buaina chhuahna hmunah hian police,  Central Reserved Police Force (CRPF) leh Tripura State Police (TSR) eng emaw zat chu venhimna kalpui tura tirh nghal an ni. 

Share this Post