Manipur-ah NSCN-IM tawmbuk chhuhsak

Manipur-a Kekru Naga thingtlang khuaah Zirtawpni liam ta khan Army-ten National Socialist Council of Nagaland- Isak Muivah (NSCN-IM) tawmbuk an chhuhsak a, hel pakhat an man bawk.

Indian Army Eastern Command chuan hemi chung chang hi Twitter-ah tarlangin NSCN-IM tawmbuk an chhuhsak thu leh ralthuam eng emaw zat an man tih an tarlang a ni.

Helte hian Zirtawpni khan Kekru Naga khuaa Nungba khuaah hian pawi an khawih nia tarlan a ni a, hemi report an dawn hnu hian sipaite hian beihpui an thlak chhunzawm a, hel tawmbuk hi an chhuhsak ta tih an sawi.

NSCN-IM hel pakhat chu a uniform hnutchhiahin mipui zingah tualchhung mi anga awm a tum a, mahse an manchhuak tho tih defence thupuangtute chuan an sawi bawk.

Hel tawmbukah hian M16 pakhat round 125 la awm, SLR pakhat, AK round 26 leh hmanraw dang eng emaw zat la awm chu an man a ni.

Defence Ministry chuan hel laka beihpui thlakna kawngah hian security force-te leh police-te chu an thawk ho ṭha hle tih an sawi a, inte­lligence agency, tualchhung thu­neitute leh tualchhung mite nen pawh an thawhhona a ṭha hle tih an sawi.

Security force-te hian beihpui hi an la thlak chhunzawm zel a ni. 

Manipur-ah hian nasa takin hel laka beihpui thlak mek a ni a, India sipaite mai bakah Myanmar sipai-te pawhin hel laka beihpui thlakte hi an thawhpui a ni.



Share this Post

Login to comment
No Comments