Sialhawk Pineapple Processing Plant lungphûm Deputy CM-in a phûm

Deputy chief minister Tawnluia chuan nimin khan a bial chhunga Sialhawkah lakhuihthei sâwngbàwlna tur, Pineapple Processing Plant din tur lungphùm a phúm. Sialhâwk khuaah hian lakhuihthei Mizorama thar zawng zawng zinga 64% an thar tih tarlan a ni.

Pineapple Processing Plant din tur hi Sustainable Development Goals-a goal pakuana, 'Fostering Industry, Innovation, Infrastructure and Livelihood Oppurtunities at Sialhawk, Lungleng and Seling’ hnuaia hmalakna pakhat a ni a; Rs 1,99,62,271.47 sènna tur a ni.

Sorkar thuchhuah tarlan danin, Sialhawk Pineapple Growers Society tarlan danin, Sialhawk khua hian nikum fûr lai khan lakhuihthei quintal 14,000 vel an thar a, ṭhál laiin fûr laia an thar hmun ngaa ṭhena hmun khat vel an thar bawk a; Sialhawkin lakhuihthei an thar hi Mizorama thar zawng zawng aṭangin 64% a tling.

Sialhawk bakah, an ṭhenawm khua - Tlangpui, Tlangmawi, Chalráng, New Chalráng, Lungtan, Khawhai, Vàngtlánga tharte chuan Mizoram lakhuihthei thar zinga 97% an thar a ni.

Lungphum puala Sialhawk com­munity hall-a inkhawmah Tawnluia chuan, Pineapple Processing Plant chu Sialhawk mipui taimakna leh ṭhahnemngaihnain a hrin chhuah a nih thu a sawi a, "Mizoram sorkar chuan SEDP kaltlangin mi tin huapzo hmasawnna tluantling a kalpui mek zel a ni," a ti.

Deputy CM chuan, processing plant hman theih a nih hunah chuan Sialhawka lakhuihthei thar aṭanga 30% vel ṭawih ral ṭhin chu a tlakhniam ngei a beisei thu sawiin, "Lakhuihthei hralhna mai bakah, Sialhawk leh a chhehvela mipui tan eizawnna thar chi hrang hrang ṭha zawk a siam ngei a beiseiawm," a ti a; rim taka thawka hlâwk taka hmang thei ngei turin duhsakna a hlân.

Tawnluia chuan, a bial chhunga kut hnathawktute tana sorkar hmalakna dangte sawiin, Tualtea tomato chingtu chhungkaw 250 hnenah pipe leh silpauline pek vek an nih thu te, Tomato Processing Plant sak mek a nih thu te, Chawngtlai leh Khawhaia sapthei chíngtu chhungkaw 100 vel ve ve tan thîrzái quintal thum ṭheuh pek a nih tawh thu te, Riangtlei, Vangtlang leh Tualtea sial vulhtute sorkarin nasa taka a puih thute a sawi bawk.

Inkhawm hi Planning & Programme Implementation secretary Lalmalsawma Pachuau-in a kaihruai a; technical report petu chief scientific officer H Lalsawmliana chuan, "Juice, jam leh thil dang siam chhuahna hmun tur a ni a, Mizoram páwn thlenga thawn chhuah tlak siam chhuah tum a ni," a ti.

Lungphum inkhawmah hian Sialhawk VC president Lalremchhunga leh Pineapple Growers Society president J Rampanmawia te pawhin thu an sawi bawk.